Auto Bild басылымы жариялаған рейтинг техникалық бақылау ұйымының мамандарымен бірге жасалған. Сарапшылар назарына шығарылғанына кемі екі-үш, көбі 10-11 жыл болған шағын жол талғамайтын көліктер ілікті.
Сарапшылардың есебінше, румыниялық Dacia Duster-дің екінші буыны жолда жиі бұзылады. Бұл машиналардың көбіне рөлінен, жарық беру және тежеуіш жүйелерінен ақау шығады. Майы да жиі ағып кетеді.
Немістер жүрілген «Дастер» орнына автоөндіруші тарапынан кепілдік берілетін жаңа көлік алуға кеңес береді.
Сарапшылар Ford EcoSport пен Nissan Juke-тің беріктігіне де күмән келтірді. Жапониялық көлік Қазақстанда танымал болғандықтан, соған қатысты пікірдің біз үшін маңызы зор. Мамандар оның әлсіз аспасына шүйлікті. Себебі бес жылдан кейін аталған бөлшектен ақау шығады, сонымен қатар тежеуіштері де дұрыс жұмыс істемейді.
Škoda Yeti, Renault Captur, Mitsubishi ASX, Suzuki SX4 S-Cross, Suzuki Vitara мен екінші буындағы Nissan Qashqai анағұрлым жоғары бағаланды. Аталған үлгілердің барлығы қолдан көлік аларда назар аударуға лайық. Бұлар да май жеп, тежеуіштері тез тозады, бірақ сапасы әлдеқайда жоғары әрі төзімді келеді.
Сарапшылар 2015 жылы сатылымға шыққан Mazda CX-3 пен Audi Q3-ті ең сенімді кроссоверлер деп атады. Жапониялық темір тұлпарды қолдан алғанда амортизаторға аса мән беру керек, ал германиялық көліктің бағасын коррозияға жиі ұшырайтын тежеуіш дискілері төмендетуі мүмкін.
Өкінішке орай, германиялық басылым жариялаған рейтингтің есебі толық емес. Себебі қолданыс барысында қай бөлшектен қандай ақау шығатыны нақты жазылмаған.
Комментариев: 0