Singer ательесі ескі Porsche 911-ді жаңа түске бояды

«Зингер» — Калифорнияда орналасқан, классикалық Porsche модельдерін әрлеумен айналысатын танымал Singer Vehicle Design шеберханасы.

Жақында тапсырыс беруші Dynamics & Lightweighting Study (DLS) бағдарламасы аясында түрленген 911-ін (964-сериялы, 1990 жылдардың басында шыққан) алды. Бағдарламаның атауынан-ақ оның басты мақсаты — автомобильдің салмағын азайту арқылы динамикалық сипаттамасын жақсарту екені білінеді.

Шеберлер донор «поршені» толық бөлшектеп, қайта қалпына келтірді. Әу бастағы 3.6 литрлік алты цилиндрлі қозғалтқыштың көлемі 3.8 литрге артты. Сондай-ақ оны айнымалы геометриясы бар екі турбокомпрессор және өзге де компоненттермен жабдықтаған. Машина артқы жетекті болып қалғанымен, мотор заманауи 6 сатылы механика қораппен жұмыс істейді.

Сол дәуірдегі Porsche 911 қазіргіден едәуір шағын болғанын ескерсек, 19 (алдында) және 20 дюймдік (артында) магний дөңгелек дискісі мен Michelin Pilot Sport Cup 2 шинасы тым үлкен сияқты көрінеді. Бірақ 700 ат күшіне ие мотормен жүретін машина үшін мұндай шешім толықтай орынды әрі қажетті саналады, одан бөлек, автомобиль мықты карбон-керамика тежеуіш жүйесімен жабдықталған.

Бүкіл шанақ бастырығы, алға шығып тұрған сплиттерден бастап ірі антиқанатқа дейін көміртекті пластиктен жасалған. Ал жалпы артқы бөлік пен артқы қанаттың дизайнын жасағанда шеберлер 1970 жылдардың аяғындағы Porsche 935-тен шабыт алғаны байқалады.

Салондағы жарысқа арналған екі кресло Pebble Grey былғарысымен және сұр алькантарамен қапталған. Аспаптар панелі қолдан жасалған Champagne түсті жиегі бар циферблатпен ерекшеленеді. Заманауи кондиционер, ортаңғы консольдегі навигация мен Apple CarPlay-мен жұмыс істейтін шағын мультимедиа жүйесі де көзге түседі.

Автомобильдің қанық көк түсінің де өз атауы бар — Fantasia Blue. Компания дәстүрге сай әр жобаға жеке ат қояды. Бұл жоба Sorcerer деп аталады. Ал модельдің толық атауы — Sorcerer-ге Porsche 911 Reimagined by Singer, оған тағы DLS Turbo қосымшасы қосылады.