Биыл маусымның аяғынан бастап Ресейге кіру ережесі өзгерген соң Қазақстан мен Ресей шекарасында ұзын-сонар кептеліс пайда болды. Адамдар ауызсу, дәретхана және демалыс орындарының жоқтығына шағымданып жатыр.
Бұл жағдай Мемлекеттік кірістер комитеті әзірлеген көлік құралдары, жүк пен тауарлардың Мемлекеттік шекарадан өту тәртібін өзгерту жобасынан кейін өзгеруге тиіс.
Жобада мынадай ұсыныстар бар:
- өткізу бекеттерінің жанында көлік жиналуын болдырмау және көлік қозғалысын реттеу үшін жергілікті атқарушы органдарды күту аймақтарын салуға міндеттеу;
- шекарадан өту үшін электронды кезекке өтінім беру кезінде жалған ақпарат берген немесе брондалған уақытын пайдаланбаған тұлғалардың жүйеге кіруін шектеу. Кепілдік қамтамасыз ету механизмін енгізу;
- шекарадан жылдам өту үшін жеке ақылы режим енгізу (жүк көліктері үшін);
- жануарлар, тез бұзылатын немесе қауіпті жүк тасымалдап келе жатқан көліктерге бөлек жол ұйымдастыру;
- фототіркеу, сәйкестендіру және мемлекеттік деректер базасымен (мысалы, VIN-код және көлік сақтандыруы) өзара әрекет ету механизмін нақтылау;
- шекарадан өту уақытын бірнеше рет брондауға шектеу қою және бронь уақытын өзгерту мүмкіндігін кеңейту.
Мемлекеттік кірістер комитеті бұл өзгертулер шекарадан өту жолын алдын ала жоспарлауда айқындықты, тәртіпті және болжамдылықты арттырады деп үміттенеді. Бұл жүргізушілер мен шекарадағы өткізу пункті қызметкерлерінің жұмысын едәуір жеңілдетуі керек.
Жағдай қашан түзеледі деген сұрақ туындайды. Биыл шекара бекеттері маңында күту аймағы пайда болады деу қиын. Оларды мемлекеттік қаржы есебінен салу қажет болса, аудандық бюджеттен шұғыл түрде қаржы іздеуге тура келеді, ал ондай ақша онсыз да тапшы. Бұл істі жеке кәсіпкерлерге тапсырса, олар үшін жер телімін бөлу, инфрақұрылым тарту сияқты шаралар қажет болады. Бәрін дұрыс, талапқа сай жасау керек, жазық далаға дәретхана қойып қана құтыла салуға болмайды. Оның үстіне конкурс, тендер өткізіп, өтінім қабылдау керек. Мұның бәрі бір күнде, тіпті бір айда шешіле қоятын шаруа емес.
Комментариев: 0