Rolls-Royce Corniche сәнді электрокар болады

Классиканы электр жетекке бейімдеуге маманданған Шотландияның Halcyon фирмасы жаңа жобасын таныстырды. Ол — Rolls-Royce Corniche моделіне негізделген су жаңа электрокар. 500 ат күшіне ие моторы бар көліктің 60 данасы ғана жарық көреді. Бағасы 420 мың фунттан (305 млн теңге) басталады.

1 / 5

• 
• 
• 
• 
• 

1 / 5

Электромод Evice Technologies фирмасы әзірлеген күштік құрылыммен жабдықталған. Ол 500 ат күшін беретін қозғалтқыш пен жүріс қоры 400 км болатын аккумулятор жинағын қамтиды (қосымша ақы төлеп жүріс қорын 480 км-ге арттыруға болады). Сондай-ақ 800 вольтты архитектура мен жылдам қуаттау мүмкіндігі бар. Кабриолет шассиінде үш жұмыс режимі және қуатты тежеуіш механизмі бар амортизатор орналасқан.

Батареялы Corniche-тың алғашқы экземпляры Highland Heather деп аталды. Оның дизайны Шотландия табиғатынан шабыт алған. Мысалы, шанақтың ерекше күлгін түсі жергілікті вереск гүлінің түсін еске түсіреді. Механикалық батырмалар сақталған алдыңғы панельде ұзындығы 1.4 метрлік жапсырма тұр, ол аймақтағы өзендерді бейнелейді. Тағы бір ерекшелік — артқы диванның шынтақ қойғышындағы карта бейнеленген екі тақтайша. Біріншісінде Rolls-Royce Corniche атауын алған Франциядағы Гранд-Корниш тас жолы, ал екіншісінде Halcyon штаб-пәтерінен Шотландия тауларына дейінгі жол кескінделген.

1 / 5

• 
• 
• 
• 
• 

1 / 5

Жабдықтар тізімінде артқы көрініс камерасымен біріккен заманауи медиажүйе, климат-бақылау және электр көмегімен реттеуге, жылытуға, желдетуге болатын кресло бар.

Тюнерлер әр автомобильді жасауға кемінде бір жыл жұмсайды. Жұмыс донорды толық бөлшектеп, қайта коллекциялық деңгейге келтіруден басталады. Дайындықтың өзіне шамамен екі мың сағат кетеді. Halcyon машина құрастыруды 2025 жылдың аяғында бастайды, демек алғашқы кабриолеттер 2026 жылдың аяғында ғана иесінің қолына тиеді.