Ресейде хакерлер Lixiang көліктерінің басқару жүйесін бұзып жатыр

Ресейде Lixiang гибридін алғандар хакерлердің кесірінен машинасының мастер-аккаунтына қол жеткізе алмай қалған. «Российская газета» хабарлағандай, кем дегенде елу жүргізуші шабуылға ұшырапты. Аккаунтқа кірген соң хакерлер 200–250 мың рубль (1.3–1.6 млн теңге) талап етеді екен.

Lixiang автомобильдері Ресейде қытайлық телефон нөміріне тіркелген мастер-аккаунтпен сатылып жатыр. Хакерлер оған жалған құжатпен провайдер арқылы қол жеткізеді.

Профильге кірген соң қаскөйлер құлыпты ашудан бастап қозғалтқышты іске қосуға дейінгі көптеген функцияны басқаруға мүмкіндік алады. Хакерлер көлік терезесін ашып-жауып, медиажүйені блоктап немесе климат-бақылау параметрін өзгертіп, жүргізушіге қысым жасайды. Бұл ақауды Ресейде жақында ашылған ресми Li Auto дилеріне барып жоюға болады, оған аса көп ақша қажет емес. Басылым дилерде мұндай қызмет құны 18 мың рубль (120 мың теңге) деп жазды.

Сарапшылар аккаунтқа кіру мүмкіндігінен айырылып қалмау үшін делдал қызметін пайдаланбай, нөмірді өз бетінше тіркеп, күрделі құпиясөз ойлап табуға кеңес береді. Қос факторлы аутентификация жүйесін де қолданған жөн.