Ресейдің Орынбор облысы мен Қазақстанның Ақтөбе облысын байланыстыратын «Жайсаң» шекара өткеліне апаратын жолда бірнеше күннен бері кезек жылжитын емес. Жеңіл көліктер, автобустар, жүк көліктері сағаттап, тіпті тәулік бойы шекарада тұр.
Lada.kz хабарлағандай, куәгерлер кезекте тұрғандарға ешқандай жағдай жасалмағанын, ауызсу, әжетхана және демалатын орындар жоқ екенін айтқан. Көптеген жүргізуші мен жолаушы түнді көлікте өткізеді, тамақ сатып алуға немесе медициналық көмек алуға мүмкіндік жоқ.
Ақтөбе облысының Мемлекеттік кірістер департаменті 13 мамырдан бастап Самара — Шымкент республикалық тас жолының «Жайсаң» бағытындағы бөлігінде жөндеу жұмыстары басталды деді. Жолда уақытша бағдаршамдар мен құрылыс шлагбаумы бар, бұл көлік өткізу қабілетін төмендетіп, кептеліске себеп болған. Осыған ұқсас жағдай Атырау облысы мен Ресейдің Астрахань облысын байланыстыратын «Құрманғазы» автомобиль өткелінде де болып жатыр. Мұнда аптап ыстықта жүздеген машина өз кезегін күтіп тұр.
«Жайсаң» шекара бекетіндегі халыққа Төтенше жағдайлар министрлігінің қызметкерлері көмектесті. 30 маусымда құтқарушылар ыстық тамақ пен ауызсу таратқан.
Тасымалдаушылар Қазақстан кеденінің ЕЭО елдерінен Ресейге бағыт алған жүкті қатаң тексеруге көшкені жағдайды қиындатты деп санайды. Бұл шекарадан өту уақытын едәуір арттырған. 30 маусымнан бастап Ресейге кіру ережесі өзгерген соң мобильді қосымша арқылы өтінімді тексеру мәселені тіпті ушықтырған. Ресейдің Бірыңғай сәйкестендіру және аутентификация жүйесіне тіркелу ерікті процедура, бірақ бұл да шекарадан өту уақытын ұзартты.
Қазір Қазақстан шекарасында 51 автомобиль өткізу бекеті бар. Сапарға шығарда олардың нақты орнын картадан көре аласыз.
Комментариев: 0