Renault-ның Ресейден кетуі АВТОВАЗ жұмысына қалай әсер етті

Көрші елдегі онлайн-алаңдардың бірінде халық концерннің баспасөз қызметін басқарып отырған Сергей Ильинскийдің Renault-мен серіктес болу Lada-ның дамуын тежеді деген пікірін қызу талқылап жатыр. Ресей бренді Renault құрылымында арзан марка саналғандықтан, француз модельдерімен бәсекелес болмау үшін заманға сай жабдық алмаған-мыс. Ал экспорттық мүмкіндігі Dacia саудасына кедергі болмасын деп шектеліпті.

Концерн өкілінің бұл сөзін қоғам қатаң сынады. «Автоград» паблигі 2022 жылы «Вестаны» рестайлингтен өткізгенде шетелдік серіктестің арқасында машина электроникадан жарықдиодты оптика мен жұмсақ панельге дейінгі көптеген жабдық алғанын еске салды. Renault болмаса, зауыттың мақтанышына айналған «Искра» мүлде шықпас еді, кәсіпорын мақтауын асырған 400 компонент жаңа емес, сапасы нашар балама деді жазба авторлары. Олар француз бренді Lada Vesta-ның келесі буынын жасауға да септескенін, жаңа көліктің шанағы металл күйінде дайын тұрғанын атап өтті.

Локализацияға қатысты пікірталас та әлі аяқталған жоқ. НАМИ сарапшысы Александр Горчаков Granta-ның локализация деңгейі небәрі 45.7 % деп мәлімдеген. Мұның арты дауға ұласып, НАМИ ресми түрде пікір білдірген соң диалогқа бұрын АВТОВАЗ-да қызмет еткен KhaDm есімді блогер қосылды. Ол француздар кеткеннен кейін Lada көліктерінде жергілікті кәсіпорындар шығарған бөлшек саны артқанын растады, алайда көп компонент, соның ішінде «Ресейде жасалған» деген заттаңбасы бар базалық бекіткіш Қытай, Үндістан, Вьетнам, Корея және Пәкістаннан жететінін айтты.