Қытайлық секонд-хенд жапон көліктерінің орнын баса ма?

«Автостат» талдау агенттігі таратқан ақпаратқа сүйенсек, жарты жылда Ресейде Қытай брендтеріне тиесілі 52 мыңнан аса ұсталған автомобиль сатылған. Екінші нарықта жақсы машина тапшы болғандықтан, 3-5 жастағы жаңа модельдерге сұраныс жоғары. Алайда «Известия» газеті Қытай өнімін қолдан аламын деп сан соғып қалуыңыз мүмкін деп жазды.

Ең алдымен аспан асты елінен жеткен техниканың физикалық жағдайы алаңдатады. «Темір тұлпарын жанын салып күтетін жапондармен салыстырғанда, қытайлар оған кәдімгі зат ретінде қарайды. Сол себепті сырты да, техникасы да күтім көрмейді», — деді «За рулём» басылымының бас редакторы Максим Кадаков.

Ұлттық автомобиль одағының президенті Антон Шапарин тағы бір қауіп техникалық тексеріс нәтижесінің ашық жазылмауымен және бөлшекке қатысты мәселемен байланысты деп санайды, өйткені көлікке кім қалай қызмет көрсеткенін анықтау өте қиын.

Қытай көлігін алған адам су астында қалған машинаның иесі атануы да мүмкін. Өйткені бұл елде күшті тайфун жиі болады.

Еуропа, Жапония немесе АҚШ жолдарында жүрген автомобильдің техникалық жағдайы мен заңға қатысты тарихын анықтау жолдары жетерлік, ал Қытай көліктерін егжей-тегжейлі тексеруге әзірше мүмкіндік жоқ. Бұл елде Carfax та жұмыс істемейді.