Қытайлар ұша алатын трицикл жасады

Kuickwheel технологиялық фирмасы Skyrider X6 деп аталатын жаңа көлік құралын таныстырды. Ол — алдында екі, артында бір дөңгелегі, төбесінде алты пилоны бар трицикл. Модель ұзақ уақыт болмаса да, әуеге көтеріліп, ұша алады. Ерекше жаңа өнімнің бағасы 498 800 юаньнан (35.5 млн теңге) басталады.

Артқы жетекті трициклдің жердегі жылдамдығы 70 км/сағ-қа жетеді, жүріс қоры — 200 км. Skyrider X6 жиырма минуттан артық ұшпайды, аспандағы ең жоғары жылдамдығы — 72 км/сағ. Ерекше көлік 10.5 киловатт батареямен жабдықталған.

Skyrider X6-ның бағасына технологиясы ғана емес, материалдары да әсер етіп отыр. Мамандар салмағын азайту үшін трициклді көміртекті пластик, композит және авиацияға арналған алюминийден жасаған.

Skyrider X6 өздігінен ұша алады: автоматты ұшып-қону және белгіленген маршрут бойынша жүру функциясы бар. Ұшу процесін қолмен басқаруға да болады. Әзірлеушілер техника қауіпсіз екенін айтты. Мысалы, қозғалтқыштардың бірі істен шыққаны екіншісінің жұмысына әсер етпейді, маңызды жүйелердің қосымша нұсқасы бар, ал оқыс жағдай болса, парашют ашылады.

Трицикл-гексакоптердің тағы бір артықшылығы — пайдалану шығыны өте аз. Бірақ мұндай көлікті жүргізу қиын, өйткені Қытай заңы азаматтардың өз бетінше ұшуына қатаң қарайды, оның үстіне жеңіл авиация ұшқышының куәлігін алуға тура келеді.