Қытайлар Volkswagen зауыттарын сатып алады

Қытайдағы ірі автоконцерндер Volkswagen-нің жағдайын мұқият бақылап, жабылатын кәсіпорындарға қызығушылық танытып жатыр. Reuters дереккөздеріне сілтеме жасап хабарлағандай, кем дегенде бір зауытты сатып алу бойынша алдын ала келіссөз басталды.

Volkswagen басшылары операциялық шығынды азайтуға тырысып, былтыр кәсіподақтармен Германиядағы кейбір зауыттың жұмысын тоқтату туралы келіссөз жүргізген. Соңғы мәліметтерге сүйенсек, компания бірнеше мың қызметкерді жұмыстан шығару және бірнеше конвейерді тоқтату туралы келісімге келді.

VW босатайын деп жатқан зауытқа Қытайдағы инвесторлар көз салып отыр. Reuters мәліметінше, мұнымен олар Еуропадағы ықпалын күшейтеді және электрокар жеткізуге салынған қосымша салықты айналып өтеді.

Мұндай инвестиция Германия мен Қытай арасындағы күрделі жағдайға саяси тұрғыдан әсер етуі мүмкін. Бұл қадам неміс билігінің беделіне қатты соққы болуы ықтимал, себебі Volkswagen жылдар бойы елдің өнеркәсіптік қуатының нышаны саналған. Сала сарапшылары Қытай билігі осылайша Германия экономикасына ықпалын тигізе ме деп алаңдайды.

Талқыға түсіп жатқан алаңдардың бірі — Оснабрюктегі зауыт. VW жоспары бойынша мұнда 2027 жылы жұмыс тоқтайды. Қытай инвесторлары Дрездендегі кәсіпорыннан да дәмелі, қазір ондағы мамандар ID.3 моделін құрастырады, алайда биыл конвейер тоқтайды екен. Расталмаған деректерге сәйкес, мәміле жасауға BYD мен Chery ерекше қызығып отыр. Жалпы бұған қатысты анық ақпарат Германияда ақпанда өтетін сайлаудан кейін белгілі болатын сияқты.

Volkswagen құрамына кіретін Audi де Брюссельдегі өндіріс алаңын жабады. Q8 e-tron электрокроссоверін шығаратын зауыт ақпанда қызметін тоқтатады. Инсайдерлер бұл кәсіпорынға Қытайдан «бағалаушылар» барғанын айтқан.

Volkswagen зауыт сату туралы жоспар құрғанын теріске шығарды. Қаржылық коммуникация департаментінің басшысы Кристофер Хаусс «РИА Новости» басылымына берген сұхбатында мұның бәрі шындыққа жанаспайды деп мәлімдеді. Бірақ концерн басшылары жабылудың аз-ақ алдында тұрған зауыттардың тым болмаса біреуін сақтап қалу үшін басқа компаниялармен бірлесіп жоба жасауы мүмкін. Мұны кәсіподақ өкілдері растағандай болды. Олардың сөзінше, Volkswagen брендін сақтап қалу шарты орындалса, ұжым Қытай өндірушілерімен бірге жұмыс істеуге дайын.