Жылдар бойы берілген субсидия мен өзге де мемлекеттік қолдау шаралары Қытайды әлемдегі қуатты автоөндірушіге және электромобиль саласында көшбасшыға айналдыруды көздеді. Бірақ дәл осы шаралар үлкен мәселе тудырды.
Reuters талдаған материалда қазір Қытай компаниялары ішкі нарық қана емес, шетелдегі тұтынушылар да игере алмайтындай көлемде машина шығарып жатқаны және одан еш пайда таппай отырғаны жазылған.
Артық өндіруден туындаған дағдарысқа компартияның саясаты себеп болды, ол пайда мен әділ бәсекелестіктен гөрі сауда көлемін, нарықтағы үлесін, жұмыспен қамтуды және экономикалық өсімді жөн көрді. Жергілікті билік бизнесмендерге арзан жер телімдері мен субсидия ұсынып, есесіне көптеп көлік өндіруді және салық төлеуді талап етеді, бұл ел бойынша артық өндірістік қуаттың көбеюіне әкеліп отыр.
Басылым автоөндірушілер шығынға ұшыраса да, бұрынғы қарқынмен жұмыс істеуге мәжбүр, себебі ақша айналымы компания қызметін жалғастыру үшін маңызды деп жазды.
— Бұл велосипед тебумен бірдей: педаль айналдырып жатқанда әбден шаршайсыз, бірақ велосипед тік тұрады, — деп Қытайдағы автоконцерн басшыларының бірі түсіндірді.
Қытай автодилерлер қауымдастығы (CADA) тамызда жүргізген сауалнамаға сәйкес, елдегі сатушылардың 30 пайызы ғана пайда тауып отыр. Дегенмен олардың өзі де тығырықтан шыға алмайды, себебі ірі автосалондар жеңілдік пен бонус алу үшін артық көлік алып жатыр.
Мәжбүрлі демпинг Қытайдағы компанияларды да, елде бизнес жүргізіп отырған шетелдік өндірушілерді де қажытты. Мақалада аспан асты елінде жасалатын Audi машиналарына берілетін жеңілдік 50 пайызға жеткені жазылған. Бастапқы бағасы 24 мың доллар болған мыңдаған жаңа Chevy Malibu «жүрген» ретінде Zcar сауда алаңында 14 мың долларға сатылып жатыр. Көп жағдайда мүлде өтпеген жаңа модельдер қаланың сыртындағы көлік зиратына аттанады.
Дағдарыс ҚХР экономикасы үшін қауіпті, себебі автомобиль өнеркәсібі мен оған қатысты қызметтер жалпы ішкі өнімнің шамамен оннан бірін құрайды. Gasgoo Automotive Research Institute мәліметінше Қытайдағы автоөндірушілердің өндірістік қуаты былтыр конвейерден түскен 27.5 млн автомобильден екі есе көп шығаруға жетеді. Мәселені зауыттарды жауып, артық жұмысшыларды қызметінен босату арқылы шешу қисынды көрінгенмен әлеуметтік жағдайдың ушығуына әкелуі мүмкін, ал Қытай билігі мұның алдын алуға тырысады.
Комментариев: 0