Қытайда автомобиль саудасы төмендеді

ҚХР автонарығында тоғыз ай қатарынан сатып алу белсенділігі төмендеп жатыр. Сауданың теріс динамикасына электромобиль сатып алғанда берілетін мемлекеттік субсидияның қысқаруы, сондай-ақ Парсы шығанағы елдерінен мұнай жеткізу тұрақсыз болып, бензин бағасының құбылуы әсер етіп отыр.

Қытай автоөндірушілер ассоциациясының (CPCA) мәліметінше маусымда елдегі жаңа автомобиль саудасы 2025 жылғы сәйкес кезеңмен салыстырғанда 23.4 % төмендеген. Ал биыл алғашқы жарты жылда жергілікті нарық 20.4 % құлдырап, 8.8 млн дана машина сатылды деп хабарлады Autonews.ru.

Автомобиль саудасы бойынша көшбасшы орынды SAIC мемлекеттік концерні сақтап тұр. Концерн өз маркаларының, сондай-ақ Volkswagen және GM-мен бірлескен брендтерінің нәтижесін қоса есептегенде жарты жылда 2.045 млн машина сатты. Одан кейін BYD (1.808 млн), Geely (1.25 млн), Chery (1.15 млн) және Changan (1.02 млн) жайғасқан.

Ішкі нарық тоқырағанымен, экспорт өсіп жатыр. Жарты жылда сыртқы сауда 70.6 %, артып, 4.28 млн автомобильге жетті. Мысалы, BYD маусымда Қытайда 228 123 машина сатса (былтырғы көрсеткіштен 22 % аз), шетелге 175 349 көлік жеткізген (2025 жылмен салыстырғанда 95 % көп).

Еуропадағы сияқты Қытайда да дәстүрлі мотормен жүретін модельдерге сұраныс төмендеп жатыр. CnEVPost мәліметіне сәйкес, маусымда сатылған автомобильдердің 62 %-ы жаңа энергия көзін пайдаланатын (NEV) көліктер болды, оның 685 мыңы — электромобиль, 241 мыңы — гибрид.