Қытай билігі автоконцерндерді біріктіруді көздеп отыр

Брендке толы Қытай автоөнеркәсібінің жағдайықиындай түсуіне биліктің салаға етене араласуы ықпал етіп отыр. Nikkei Asia хабарлағандай, ҚХР Мемлекеттік активтерді бақылау және басқару комиссиясы Chongqing Changan Automobile, Dongfeng Motor Corp және China FAW Group секілді ірі өндірушілерді қоса алғанда, шамамен 100 автокомпанияның жұмысын қадағалайды.

Бейжіңде өткен іс-шарада аталған мекеме басшысының орынбасары тиімділікті арттыру, артық шығынды қысқарту және елдегі автомобиль паркін электрлендіру үрдісін жеделдету мақсатында өз қарамағындағы кәсіпкерлерді компаниясын қайта құрылымдауға шақырды. Ресурстарды біріктіру арқылы мемлекеттік компаниялар нарықтағы өзгеріске жедел бейімделетін жеке сектордағы фирмалармен салыстырғанда бәсекеге қабілетті бола алады.

Ақпанда South China Morning Post газеті Қытай үкіметі Dongfeng пен Changan брендтерін бір холдингке айналдыру мәселесін қарастырып жатыр деп жазды. Бұл іс жүзеге асса, жаңа концерн Қытайдағы ең ірі электромобиль өндірушіге айналуы ықтимал. Әзірге бұл екеуі көш басындағы BYD-ден қалып келеді.

Жергілікті автоконцерндердің қосылуына АҚШ-пен басталған сауда соғысы да әсер етуі ықтимал. 9 сәуірден бастап Америка билігі Қытайдың барлық өнімі үшін сұралатын кеден алымын 104 %-ға көтерді.