Қысқы дрифт 8 наурызда аяқталады

Елдің оңтүстігіндегі қысқы автоспорт маусымы аяқталуға жақын. Алдағы демалыста Алматы маңында жаңа Winter Asia Drift Show (WADS) сериясының соңғы кезеңі өтеді.

Дрифтерлер Қапшағай су қоймасының жағасындағы ASP Club кешеніне үшінші рет жиналады. Қорытынды жарыс Қазақстан, Ресей, Қырғызстан және басқа елдердің қатысушылары арасынан WADS 2025 үздік пилотын ғана емес, ең мықты команданы анықтайды.

Екі кезеңнен кейін жеке сында Уфадан келген Андрей Челушкин сөзсіз фаворит атанды. Ол рөлі сол жақта орналасқан Toyota Mark II (JZX81) седанымен өнер көрсетеді, капотының астында Honda-ның K24 қозғалтқышы жайғасқан. Командалық есепте алғашқы үштіктің арасында айырмашылық аз, сондықтан жеңіс «Дрифтанутые Моторспорт», ASP Racing немесе No Fear командаларының кез келгеніне бұйыруы мүмкін.

Үшінші кезеңнің төрешілері:

• Мақсат Қайымов — қазақстандық дрифтер, төреші әрі комментатор.
• Понд (Daychapon Toyingcharoen) — Таиландтан келген кәсіпқой дрифтер, D1 GP Thailand және Formula Drift Japan сайысына қатысқан.
• Степан Земцев — Ресейден келген тәжірибелі төреші, RDS GP бойынша 2024 жылдың үздік менеджері.

WADS-тың үшінші кезеңінің ресми бөлімі 7 наурызда іріктеу сайысынан басталады. Ол екі сессиядан тұрады: біріншісі — 08:00-ден 10:30-ға дейін, екіншісі 19:00-21:30 аралығында өтеді. Арасында картинг өтеді. Көрермендер алаңға 08:00-ден бастап кіре алады.

Негізгі жарыс 8 наурызға жоспарланған. Кестесі алдыңғы екі кезеңнен ерекшеленеді. ASP Club аумағына 08:00-ден бастап кіруге мүмкіндік бар. Дәл осы уақытта қатысушылар жұп болып күш сынасады. Кейін 11:00-ден 19:00-ге дейін қонақтар кешен ішіндегі конькимен сырғанау, картинг сияқты түрлі ойын-сауыққа қатыса алады. Шара 19:00-де қайта жалғасып, шамамен 23:00-ге дейін созылады.

WADS-қа кіру ақылы. Билетті ASP Club ресми сайтынан алуға болады. Бағасы 5000 теңгеден басталады.

Бара алмайтындар YouTube-тегі ресми трансляциясын тамашалай алады.