Сонау 2013 жылы Өскеменде жылына 120 мың машина жасауға қауқары жететін толық циклді зауыттың іргетасы қалана бастаған. «Азия Авто» онда Lada модельдерін өндіріп, алыс-жақын шетелге сатуды көздеді.
Кәсіпорынның құрылысы 2016 жылы аяқталуы керек еді, алайда мерзім өзгере берді. 2020 жылы компания Индустрия және инфрақұрылымдық даму министрлігімен дауласып, ақыры бұл жоба ғана емес, жұмыс істеп тұрған өндіріс орны да тұралап қалды, кейін тіпті «БИПЭК АВТО — Азия Авто» жабылып тынды.
2022 жылы «Азия Авто» акционерлік қоғамына тиесілі Өскемен қаласы, Бажов көшесі, 101/1 мекенжайында орналасқан ғимараттар кешені мен көлік құрастыратын орындар саудаға түскен, енді шенділер толық циклді кешенді сатайын деп жатыр. Бірақ аукционға жеке бизнес қатыспайды. Билік оны мемлекеттік заңды тұлғаға беруге ниетті.
Лоттың бастапқы бағасы — 0 теңге. «ФениксКоммерц» компаниясының есебінше кешеннің өзі мен ол тұрған жердің жалпы құны 23 267 885 900 теңге шамасында. Онда түрлі жабдық, құрылғы, жиһаз т.б. барын ескерсек, тағы 124 397 900 теңге қосуға болады.
Комментариев: 0