Қырғызстанда полиция жүргізушілердің білімін тексереді

Көрші ел билігі жол апатын азайту мақсатында жаңа ереже енгізетінін хабарлады. Ел президентінің баспасөз хатшысы Аскат Алагөзов Facebook-тегі парақшасында 1 қыркүйектен бастап жол ережесін бұзған жүргізуші экспресс-емтихан тапсырады деп мәлімдеді.

Тапсыра алмаған жағдайда полицейлер жүргізушінің куәлігін алып, «Унаа» мекемесіне жібереді. Ол көлік басқару құқығынан айырылмайды, бірақ куәлігін қайтару үшін қайта тест тапсыруы қажет. Аскат Алагөзов тестілеу ақылы екенін және тапсырған сайын баға өсетінін айтты. 500 сомнан (3 мың теңгеге жуық) басталып, төртінші рет 4000 сомға (шамамен 23 мың теңге) жетеді. Мұндай шара тестілеуге мұқият дайындалуға ынталандырады.

Президенттің өкілі жаңа шара жүргізушілерді Жол ережесін үйренуге мәжбүрлеу үшін енетінін атап өтті. 2020 жылға дейін елде куәлік сатылып келген, ал емтихан тапсырып алғандар 30 % құрапты. Қазір құжатты сатып алатындар азайғанымен, жол ережесін білмейтіндер көптеген жол апатына себеп болып отыр.

«1 қыркүйекке дейін әлі бес ай бар. Жол ережесін нашар білетіндерге қазірден бастап оқуға кеңес береміз. Егер 1 қыркүйектен кейін куәлігіңіз уақытша „Унааға“ кетсе, ренжімеңіз», — деп ескертті Аскат Алагөзов.