Қуатты Hyundai Ioniq 6 N: алғашқы фотосуреті

Hyundai Ioniq 5 N-нен кейінгі екінші қуатты электрокарының алғашқы суретін жариялады. Алғашқы фотодан марка модельге арнап ірі бодикит әзірлегені байқалады, қозғалтқышын қазір қолданыстағы кроссоверден алады деген ақпарат бар.

Ioniq 6 N шығады деген ақпарат стандарт Ioniq 6 рестайлингтен өткен кезде пайда болған, енді бренд модельдің суретін көрсетті. Спорткар дизайны өзгеше нюанстармен ерекшеленеді. Мысалы, суреттен агрессивті ауатартқышы бар алдыңғы бампердің бір бөлігі мен арка кеңейткіш көрінеді. Дөңгелектің айналасындағы түтін көліктің дрифт-мүмкіндігі мол екенін аңғартуы мүмкін.

Артқы бөлігі де біршама өзгерген. Жүксалғыш қақпағымен біріккен үлкен спойлермен бірге тірегі бар антиқанат орнатылған. Тизерден машинаның жарық техникасын да көруге болады, бірақ ол өзгермеген сияқты.

Ioniq 6 N Ioniq 5 N-ның электромоторы мен электроникасын алатын шығар. Кроссовер 650 ат күшіне ие екі қозғалтқышпен жүреді, 3.4 секундта жүзге дейін жылдамдық алады. Сондай-ақ бірнеше жүріс режимі бар.

Hyundai жаңа өнімін жаз ортасында Гудвудта өтетін Британияның «Жылдамдық фестивалінде» таныстырады.