Қаржы министрлігінің Мемлекеттік кірістер комитеті хабарлағандай, биыл алғашқы 5 айда Қазақстанға шетелден (ЕЭО және өзге елдер) 38 044 жаңа және ескі техника кірген. Бұл былтырғыдан — 2.58 есе (98 478 дана), 2023 жылғы көрсеткіштен 3.2 есе (123 767) аз.
Бұған 2024 жылы 1 желтоқсанда күшіне енген елге машина әкелуге қатысты жаңа тәртіп, көлік құралының электронды паспортын енгізу және биыл 1 қаңтардан бастап Қырғызстаннан көлік жеткізуге қойылған шектеу әсер еткені анық. Осы талаптарға байланысты жеке дилерлер үшін көлік импорттау біршама қиындады.
Amanat партиясы жанындағы коррупцияға қарсы комиссияның отырысында МКК төрағасының орынбасары Қайрат Жұмағұлов биыл импорттаушылар машинаның экокласын асыра көрсететін жағдайлар азайғанын айтты. 2024 жылы кеденшілер Техникалық реттеу және метрология комитетімен бірге 3923 көлік құралын тексеріп, 116 фактіні анықтаған, биыл 3888 машина арасынан небәрі 16 ереже бұзу әрекеті кездесті.
Қ.Жұмағұлов импорттаушылар көліктің кедендік құнын төмендетіп көрсететін жағдай биыл да кездескенін атап өтті. Шенділер алғашқы 5 айда жеке және заңды тұлғалардан 11.9 млрд теңге көлемінде қосымша кедендік және басқа төлем өндіріп алды.
Ал жаңа автомобиль нарығы жанданып келеді. Қазақстан автокөлік одағы биыл бес айда елдегі ресми дилерлер 85 467 жаңа машина (+ 28.7 %) сатқанын хабарлады. Олардың тең жартысын тұрғындар несиеге алған.
Комментариев: 0