Қазақстандағы Еуропа маркалары: 2025 жылы қай бренд көп өтті?

Қазақстанның жаңа автомобиль нарығында Еуропа модельдеріне сұраныс аз, біздің елде Корея мен Қытай маркалары және Chevrolet көп өтеді. Соған қарамастан нарықта оннан аса Еуропа бренді сатылып жатыр. Оның кейбірінің саудасы жаман емес, ал кейбірі биылғы бес айда бірнеше дана ғана көлік сатқан. Бүгін сол туралы жазамыз.

Еуропа автомобильдерін премиум немесе бюджеттік деп бөлмей, біртұтас қарасақ, бес айдың қорытындысы бойынша Škoda, BMW және Mercedes-Benz көш бастап тұр. «Шкода» басқалардан әлдеқайда көп көлік сатқан. Чехиялық брендтің автосалондары 924 машина саудалады, ал Еуропа брендтерінің жалпы саудасы — 1772 автомобиль.

Škoda-ның Қазақстандағы танымалдығына Ресей тұрғындары әсер етіп отыр. «Автостат» қаңтар мен мамыр арасында біздің елден Ресейге 463 Kodiaq өткенін хабарлады.

BMW жыл басынан бері Қазақстанда 207 автомобиль сатты. Көрсеткіш 2024 жылдың сәйкес кезеңімен салыстырғанда жақсы, былтыр дилерлер небәрі 155 машина саудалаған. Яғни сауда 33.55 % өсті. Бірақ бренд 2023 жылғы қаңтар мен мамыр арасында бұдан әлдеқайда көп көлік сатқан (698 дана). Ол кезде 319 дана X5 иесін тапқан болатын.

Үздік үштікті Mercedes-Benz түйіндеп тұр. Неміс бренді 178 машина сатып, саудасы бір жыл бұрынғы көрсеткіштен (251 көлік) 29 % төмендеді. 2025 жылы марка өнімдері арасында G-Class ең көп өтті — 43 данасы сатылды.

Еуропа маркалары арасындағы үш аутсайдер — Renault, Alfa Romeo және Opel. Бірінші бренд жалғыз экземпляр Koleos сатты, екінші марка бір-бір дана Stelvio мен Giulia саудалады, ал Opel үш Crossland кроссоверін өткізді: біреуі ақпанда, екеуі сәуірде сатылды.

Citroen-ның Қазақстандағы саудасы жайлы ақпарат жоқ. Сайты бар, Астанадағы салоны жұмыс істеп тұрған сияқты, бірақ француз бренді ресми есебін жариялаған жоқ. Компания 2023 жылы шыққан C3 Aircross шағын кроссоверін сатып жатыр.

1 / 5

• 
• 
• 
• 
• 

Škoda Kodiaq

Škoda Karoq

Škoda Octavia

Porsche Cayenne

Audi Q5

1 / 5

Жеке модельдер рейтингінде Škoda Kodiaq кроссовері көш бастап тұр. Бірінші және екінші буындағы автомобильдің 659 данасы өтті. Одан кейінгі екі орын да Қостанайда шыққан чех модельдері — Karoq кроссовері (137 дана) мен Octavia лифтбэгіне (119) бұйырды. Үздік бестікке Porsche Cayenne (93) мен Audi Q5 (84) енді.