«Қазақстандағы қалалық мобильділікті дамыту» форумында Sergek Group компаниясының бас директоры Евгений Ким жүргізушілердің рейтингі тұжырымдамасын таныстырды. Ол қазір жолаушы жүргізушінің рейтингін көбіне басқа адамдардың пікіріне қарап біледі, бірақ нақты қауіпсіздік деңгейі туралы ақпарат өте аз деді. Жасанды интеллект пікірге емес, нақты дерекке негізделген рейтинг жасайды. Нәтижесінде әр жүргізушінің жаңарып отыратын динамикалық қатер профилі болады.
Евгений Ким мұндай тәсіл бәріне тиімді деп ойлайды. Жолаушы үшін сапар қауіпсіз бола түссе, агрегаторлар апат санын және беделіне төнетін қауіпті азайтады. Сақтандыру компаниялары тарифті дәл есептей алады, ал мемлекет жол қауіпсіздігін арттыруға көмектесетін қосымша құралға қол жеткізеді.
Кәсіпкер жасанды интеллект қауіпсіздік белдігі мен ABS жүйесі сияқты көлік қауіпсіздігіндегі міндетті элементке айналуға тиіс деді. Қазір айыппұл салу, тергеу не куәліктен айыру тәрізді қауіпсіздік шаралары жүргізуші ереже бұзған соң немесе жол апатынан кейін ғана қолданылады. AI қауіпті болжауға және апат болмай тұрып оның алдын алуға мүмкіндік береді. Жүйе жүргізушінің әрекетіне қатысты көптеген параметрді талдай алады: жол ережесін бұзу тарихы, жүргізу стилі, күрт үдеу мен тежеу, жылдамдықты асыру, шаршағандық, жұмыс ауысымының ұзақтығы, ауа райы және жолдың белгілі бір бөлігіндегі апат деңгейі. AI осы ақпаратты негізге алып, жүргізушінің немесе көлік құралының жол апатына ұшырау ықтималдығы артқан-артпағанын анықтайды.
«Бұрын технология апаттың тек салдарын тіркейтін. Енді жасанды интеллект қауіпті болжай алады. Кейін ақылды қаланың басты міндеті жол апатынан соң кінәліні анықтау емес, апатқа жол бермеу болады», — деді Евгений Ким.
Комментариев: 0