2022 жылы жазда Владивостокта тек электромобильдерді жалға беретін каршеринг қызметі іске қосылады. Қала тұрғындары мен қонақтарына Қазақстанда құрастырылған JAC iEV7S кроссовері (116 ат күшіне ие, батарея қуаты — 39 кВт.сағ) қысқа мерзімге жалға беріледі. Машина Қостанайдағы «СарыарқаАвтоПром» зауытында шығарылады.
Ресейде JAC iEV7S 2.8 миллион рубль (16 млн теңге) тұрады. Ал Қазақстанда мұндай машина (комплектациясы бірдей) 14.9 миллион теңгеге сатылады.
«КоммерсантЪ» газетінің хабарлауынша, каршеринг операторы «ВТБ Лизинг» компаниясымен 15 электромобильді лизингке беру туралы келісім жасасты, оның жалпы құны 31.5 млн рубль (179 млн теңге) болды. 2022 жылы жазға қарай iEV7S паркі 70 данаға дейін өседі, ал алдағы екі жылда электромобильдердің жалпы санын 140-қа жеткізу жоспарланған.
Жаңа каршеринг қызметінің тарифі қандай болатыны әлі жарияланған жоқ, бірақ Ресейдегі өзге де осындай қызметтермен ұқсас болуы мүмкін.
Айта кетейік, электромобильдерді жалға беретін каршеринг қызметі Ресейде бұрыннан бар. Мысалы, Мәскеуде «Яндекс.Драйв» арқылы Nissan Leaf-ті жалға алуға болады. 2021 жылы қыркүйекке дейін Қырымда қытайлық JAC iEV7S ұсынылатын MoreElectric қызметі жұмыс істеді.
Анықтама ретінде: Владивостоктағы каршеринг қызметін екі компания жүзеге асырады. Олар — Sollers холдингі мен энергетика саласындағы алпауыт «РусГидро».
Комментариев: 0