Қазақстанда автоөндіріс көлемі артты

Биыл Қазақстанда жаңа автомобиль саудасы 2025 жылғы көрсеткіштен төмен, бірақ автозауыттардың нәтижесі былтырғыдан біршама жақсы.

ҚР Ұлттық статистика бюросының мәліметінше қаңтар мен сәуір арасында елде 63 403 техника жасалған. Бұл былтырғы сәйкес кезеңмен салыстырғанда 35.1 % көп. Статистика жеңіл автомобиль, жеңіл коммерциялық техника, жүк көлігі, автобус, арнайы техника және тіркемені қамтиды.

Сәуірде зауыттар 18 144 дана техника құрастырды. Бұл көрсеткіш былтыр сәуірдегі нәтижеден — 31 %, биыл наурыздағыдан 3.9% жоғары.

Әрине, мұның көбі жеңіл автомобиль (93.15%). Төрт айда конвейерден 59 057 жеңіл көлік түсті. Арнайы техникаға әлдеқайда аз, жыл басынан бері небәрі 177 данасы шыққан. 2026 жылы барлық сегментте өндіріс көлемі артқанымен, дәл осы арнайы техника өндірісі 12.4 % төмендеді.

Қазақстанның автокөлік одағы хабарлағандай, Қостанайдағы Allur көшбасшы орнын соқтап қалды. Кәсіпорын Chevrolet, JAC, Jetour, MG, Geely Galaxy, Soueast және Škoda сияқты бірнеше марканың өнімдерін құрастырады. Биыл 23 161 автомобиль шығарды. Екінші орынға Алматыдағы жаңа Astana Motors Manufacturing Kazakhstan (AMMKZ) зауыты жайғасқан (17 710 автомобиль), үздік үштікті оған жақын орналасқан Hyundai Trans Kazakhstan түйіндеп тұр (13 373 машина). Былтыр күзде ашылған жаңа Kia зауыты 6575 көлік өндірді.

Елде автоөнеркәсіптің өсуіне екі жаңа кәсіпорын әсер еткенін байқап отырмыз. Өйткені Allur мен Hyundai Trans Kazakhstan-ның 2026 жылғы өндіріс көлемі тиісінше 12.7 және 28.4 % қысқарған. Қостанайдағы өндіріс процесінің бәсеңдеуіне Kia модельдерінің басқа зауытқа көшуі әсер еткені анық, ал Hyundai-нің көрсеткіші неге құлдырағаны белгісіз.

Биыл Қазақстанда ең көп жасалған машина Chevrolet Cobalt. Бюджеттік седанның 7755 данасы конвейерден түсті. Ал екінші және үшінші орынға Hyundai Tucson (4610 дана) мен Kia Sportage (2246 дана) жайғасты.

2026 жылдың алғашқы төрт айындағы нәтиже бойынша елде жасалған ең танымал 10 марка