Қазақстан шекарасынан көлікпен қалай өтуге болады?

Кей жүргізуші демалыста көрші елдерге көлікпен барғысы келеді. Біз ел шекарасынан қай жерден және қалай машина мініп өтуге болатынын түсіндіреміз.

Қазақстан Ресей, Қытай, Қырғызстан, Өзбекстан және Түрікменстанмен шектеседі. Бұл елдермен шекарада 51 автомобиль өткізу бекеті бар. Олардың орналасқан жерін төмендегі картадан көре аласыз:

Қазір Маңғыстау облысындағы «Тәжен», Түркістан облысындағы «Қазығұрт», «Атамекен» және «Жібек жолы» бекеттері жөндеуден өтіп жатыр. Олардан қазірше жеке тұлғалар өте алмайды. Басқасы әдеттегідей жұмыс істеп тұр.

Көрші елдерге көлікпен өту үшін мына құжаттардың түпнұсқасы керек:

• паспорт;
• жүргізуші куәлігі;
• техпаспорт;
• машина басқа тұлғаға тиесілі болса, міндетті түрде «ҚР аумағынан шығуға рұқсаты бар» деп жазылған сенімхат сұралады;
• техбайқаудан өткенін растайтын диагностикалық карта (шетелде қажет болуы мүмкін).

Қазір тек Түрікменстанға баратындар виза рәсімдейді. Онсыз көрші елдің аумағына кіре алмайсыз.

Баратын елдің заңдарын ескере отырып, медициналық сақтандыру не қонақ үй брондау құжаттарын алып жүрген жөн. Құжаттар мен талаптар тізімін алдын ала біліп алған абзал. Мысалы, Ресейге бару үшін біздің азаматтар жолға шығардан кем дегенде 72 сағат бұрын электронды өтініш жазуға тиіс.

Автомобильтдің сақтандыру полисі әдетте кедендік бақылаудан өткеннен кейін шетелде рәсімделеді.

Бірақ керек болып қалуы ықтимал құжаттардың көшірмесін алып алсаңыз артық етпейді.

Көлікпен Қазақстан шекарасынан өту алгоритмі:

• өткізу пунктіне жету, рұқсат алған соң тексеретін алаңға өту;
• багажы мен қолжүгі бар жолаушылар алдымен терминалға барып, содан соң паспорт тексеретін жерден, кедендік бақылаудан өтеді;
• жүргізуші автомобилін тексерушілерге қалдырып, паспортын тексертеді;
• барлық тексеріс аяқталған соң саяхатшылар көлікке отырып, шығатын жақты бетке алады;
• әскери қызметкер тексерістен өтті деген белгі бар-жоғын анықтап, машинаның өткізу пунктінен шығуына рұқсат береді.

Регламент бойынша біздің елде бір адамды тексеру уақыты 3 минуттан, жеңіл көлік — 15 минуттан, жүк көлігі — 25 минуттан, автобусты тексеру 35 минуттан аспауы керек. Алайда, іс жүзінде бұл норма сақтала бермейді.

Қандай да бір қиындыққа тап болсаңыз, 1466 нөмірі арқылы ҚР ҰҚК Шекара қызметінің байланыс орталығына хабарласыңыз.

Сапарыңыз сәтті болсын!