2019 жылдың қаңтарында Jeep Cherokee XJ көлігін сатып алған ер адам Калифорниядағы Сьерра-Невада тауында орналасқан Тахо көліне бармақ болады. Jalopnik.com хабарлағандай, ол жол тартқан тау жотасында ауа райы құбылмалы екен. Бастапқыда қары әбден тапталған жолмен келе жатқан жол талғамайтын темір тұлпар кенет омбы қарға батып қалады. Сол аралықта қар қатты жауып, күн суытып кетеді де, инженердің Jeep-ті тастап кетуіне тура келеді.
Ертесі қайта оралған ол көлігінің қақпағына дейін қарға батқанын көреді. Бұл уақытта қар әлі де жауып тұрған еді, түскі екі шамасында автокөлік толықтай қар астында қалады. Мұндай жағдайда көлікті аршып алу мүмкін еместігін түсінген иесі көктемде бір-ақ келу жөнінде шешім қабылдайды.
Инженер қар құрсауында қалған автокөлікке тек төрт айдан кейін ғана қайта оралады. Өткен аптада ол достарымен бірге темір тұлпар «көмілген» жерге келеді, бірақ көлікті табу қиынға соғады. Оны табу үшін осы төңіректің фотосуреттерімен қатар, 12 метрлік пластик құбырларды да пайдаланады.
Жол талғамайтын көлікті әзер дегенде тауып, аршып алғаннан кейін Jeep-ке зақым келгені анықталды. Үш метрлік қардың құрсауында қалған көліктің төбесі жапырылып, алдыңғы терезесі мен бүйірлік айналары сыныпты, басқа да ақаулар анықталған. Десе де джиптің иесі қамықпайды, ол барлық шығын сақтандыру есебінен өтеледі деп сенеді.
Комментариев: 0