Қаңтарда Tesla саудасы құлдырады

2025 жылдың басында Tesla электромобильдері негізгі нарықтарда жақсы өтпеді. Мысалы, Қытайда қаңтар көрсеткіші желтоқсанмен салыстырғанда екі есе нашар, ал Францияда Tesla-ға сұраныс 63 % азайды. Сарапшылар бұл жағдайға автонарыққа тікелей қатысы жоқ факторлар да әсер етіп отыр деп есептейді.

Қытай жеңіл автомобильдер қауымдастығының мәліметінше қыстың алғашқы айында Tesla Қытайда 33.7 мың электрокар сатқан. Бұл бір жыл бұрынғы көрсеткіштен небәрі 15.5 % аз, бірақ желтоқсандағы 83 мың көлікпен салыстырғанда айтарлықтай төмен. Шанхайдағы зауыттан экспортталған электромобиль көлемі шамамен үш есе (10.8 мыңнан 29.5 мыңға) өсті.

Cnevpost басылымының сарапшылары бұған аспан асты елінде ұзаққа созылған Жаңа жыл мерекесінің қатысы бар екенін атап өтті. Шанхайдағы Tesla зауыты жаңа Model Y өндірісін ретке келтіру үшін уақытша жұмысын тоқтатқан. Жалпы алғанда биыл қаңтарда NEV нарығы 43 % түсті.

Еуропа елдері арасында америкалық брендтің танымалдығы Германияда (—59.5 %), Швецияда (—44 %) және Нидерландыда (—42 %) азайды. Ұлыбританияда сауда небәрі 12 % түскенімен, елдегі электрлі көліктер нарығы 35 % өсті, нәтижесінде Tesla-ның нарықтағы үлесі қысқарды. Көрсеткіштердің нашарлауына жаңа Model Y-дың нарыққа шығуын күтіп отырған клиенттер себеп болды.

Сарапшылардың пікірінше бренд имиджі компания басшысы Илон Масктың екіұшты саяси әрекеттері салдарынан зиян шекті. Reuters агенттігі Швецияда жүргізілген сауалнаманы мысал ретінде келтірді. Соңғы уақытта Tesla жақтастары 19-дан 11 %-ға кемісе, брендті құптамайтындардың үлесі 47-ден 63 %-ға артқан.