Қала әкімдігі 22 қарашадан бастап кептеліс болып жатқан қиылысқа кірген жүргізуші айыппұл төлейтінін хабарлаған. Бес қиылыстағы камера ереже бұзғандарды тіркейді. Ал желтоқсанда олардың саны екі есе өседі. Торлы таңбаны елемеген жүргізушіні камера қалай анықтайтынын Kolesa.kz редакциясына Sergek Group мамандары айтып берді.
Көлік құралын тіркеу алгоритмі Әкімшілік кодекстің нормаларына негізделеді.
«Жүйе көлік құралының орналасқан жерін кадрлар арқылы талдайды, яғни, жүргізуші алда бос орын қалмаған кезде таңбаға кірді ме, оның бұл әрекеті көлденең бағыттағы көліктерге кедергі келтірді ме, соны анықтайды», — деді мамандар.
Оқиғаны бағалауда секунд саны маңызды емес (машина жолды қанша уақыт бөгегені — Kolesa.kz ескерт.), Әкімшілік кодексте көрсетілгендей, кептеліс болған-болмағаны есепке алынады. Жүргізуші кептеліс болып жатқан қиылысқа кіріп, көлденең бағыттағы көлікке кедергі келтірсе, жүйе мұны ереже бұзу деп бағалайды.
Жүйе жүргізушіні торлы таңбаның шетін басқаны үшін емес, жолды бөгегені үшін айыпты етеді. Егер автомобиль көлденең бағыттағы қозғалысқа кедергі келтірмесе, басқа машина еркін өте алса, көліктің бір бөлігі таңбаны басып тұрса да ереже бұзған болып есептелмейді.
Солға бұрылған кезде жүргізуші қарсы бағыттан өтіп жатқан машинаға байланысты маневрді аяқтай алмай қалатын жағдайлар болады. Мұнда да жүйе жүргізуші кептеліс болып жатқанда қиылысқа кірді ме және басқа көліктерге кедергі келтірді ме деген критерийге мән береді.
Комментариев: 0