Елдегі мамандандырылған ХҚКО, автобазарлар, автосалондар мен қызмет көрсету орындарының жабылғанына біраз болды.
Алматы
19 наурыз күні оңтүстік астана аумағында карантин режимі енгізілді. Мұнда адамдардың қалаға кіріп-шығуына тыйым салынып, көлік қозғалысы қатаң шектелген. 28 наурыздан бастап қала тіршілігін қамтамасыз ететін аса маңызды салалардан басқа ұйымдар мен кәсіпорындардың жұмысы толық тоқтады. Қоғамдық көлік тек 19:00-ге дейін жүреді. ТЖО, көлік жуатын орындар мен автосалондар мүлде жұмыс істемейді.
Нұр-Сұлтан
Елордада карантин 19 наурызда жарияланды, ал 28 наурыздан бастап шектеулер күшейтілді. Қала шетіне блокбекеттер қойылып, автокөліктердің себепсіз қозғалуына тыйым салынды. Қоғамдық көліктің жұмысы кезең-кезеңімен қысқартылуда. ТЖО, көлік жуатын орындар, автосалондар жұмыс істемейді.
Шымкент
31 наурыз күні 19:00-де қала карантинге жабылды. 4 сәуірде қала ішінде жеке көлікпен қозғалуға тыйым салынды. Мегаполис тұрғындары үйлерінен тек азық-түлік алу, банкке және медициналық мекемелерге бару үшін ғана шыға алады. Сондай-ақ, халықтың саябақтар мен тамақтанатын орындарға баруына тыйым салынған. Қоғамдық көлік тек 7:00-ден 19:00-ге дейін жүреді. Азық-түлік сататын базарлар 10:00-ден 18:00-ге дейін, ал азық-түлік дүкендері 10:00-ден 21:00-ге дейін жұмыс істейді. Мұнда 55 жастан асқан тұрғындардың аса қажеттілік болмаса көшеге шығуына тыйым салынған.
Ақмола облысы
Бұл өңірде карантин режимі 31 наурызда енгізіліп, транзиттік жүк тасымалдайтын көліктерден басқасының облыс аумағына кіріп-шығуына тыйым салынды. Сауда орындарының басым бөлігі жұмысын трқтатты. Облыс тұрғындарына аса қажеттілік болмаса үйден шықпауға кеңес берілді.
Алматы облысы
Аталған аймақта 31 наурызда енгізілген карантин аясында санитарлық бекеттер орнатылып, адамдар мен көлік қозғалысы шектелді. ТЖО, көлік жуатын орындар мен автосалондар жабылған. Жолаушы тасымалдаумен тек ресми такси қызметтері ғана айналыса алады.
Ақтөбе облысы
31 наурыздан бастап халық пен көлік құралдарының облыс пен Ақтөбе қаласының аумағына еркін кіріп-шығуына тыйым салынды. Тек азық-түлік, дәрі-дәрмек сынды маңызды тауар тасымалдайтын көліктер ғана қатынай алады. Жергілікті автобазарларды қоса алғанда, сауда орындарының басым бөлігі жабық. 6 сәуірден бастап Ақтөбеде азық-түлік дүкендері (10:00-ден 20:00-ге дейін жұмыс істейді), дәріханалар, халық тіршілігін қамтамасыз ететін қызметтер, емдеу ұйымдары, жанармай құю бекеттері мен техникалық жөндеу орталықтары ғана жұмыс істеп тұр.
Қоғамдық көліктің жұмыс кестесі: 7:00-ден 9:00-ге дейін, 12:00-ден 14:00-ге дейін, 17:00-ден 21:00-ге дейін. Қала түрғындарының себепсіз үйден шығуына тыйым салынған.
Атырау облысы
30 наурыздан бастап Атырау қаласына кіріп-шығуға тыйым салынып, аудан тұрғындарының облыс, аудан, қала аралығында қатынауына шектеу қойылды. Облыс және аудан аралығында жолаушы тасымалдауға да рұқсат жоқ. Автовокзалдар мен автобекеттер жұмысын тоқтатты. Адамдар аса қажеттілік туындамаса, үйден шықпауға тиіс.
21:00-ден 6:00-ге дейінгі аралықта әкімдік, құқық қорғау, жедел жәрдем, санитарлық-эпидемиологиялық қызмет, өрт сөндіру, құтқару, апаттық-техникалық қызмет мамандары мен қала тіршідігін қамтамасыз ету және байланыс қызметкерлерінің ғана қызметтік куәлік не арнайы анықтама арқылы қозғалуына рұқсат берілді.
Шығыс Қазақстан облысы
Өскемен және Семей аумағында коронавирустың таралуына қарсы шектеу шаралары 2 сәуірде енгізілді. Аталған қалаларға бұрын сыртқа шығып кеткен тұрғындардың оралуына және қалада жүрген басқа өңір тұрғындарының кері қайтуына ғана рұқсат берілді. Көлік пен халықтың қозғалысын бақылау үшін Өскеменде 7, Семейде 8 бақылау-өткізу бекеті орнатылды. Тұрмысқа аса қажет тауарлар мен дәрі-дәрмек, азық-түлік, қорғаныс құралдары, гигиеналық заттар және жанар-жағармай таситын көліктер жасыл дәліз арқылы өтеді.
Бұл өңірде көлік қозғалысы айрықша режимге бағынады. Күнтізбенің жұп санды күндерінде 0-ді қоса алғанда, тек жұп санға аяқталатын нөмірге ие көліктер, ал тақ санды күндері тақ санға аяқталатын нөмірге ие көліктер еркін қозғалады. Сонымен қатар, 6 сәуірден бастап екі қаланың тұрғындары тек рұқсатқағазбен ғана жүреді.
Жамбыл облысы
Бұл өңірде карантиндік шаралар 31 наурыздан бастап күшіне енді. Көлік қозғалысына шектеу қойылып, көлік жуатын орындар, ірі сауда нысандары мен автобазарлар жабылды. Жергілікті тұрғындардың себепсіз үйден шықпауына кеңес берілді.
7 сәуірде Тараз қаласы да карантинге жабылды. Қала аумағында тек құқық қорғау, жедел жәрдем, санитарлық-эпидемиологиялық қызмет, өрт сөндіру құтқару, апаттық-техникалық қызмет мамандары мен қала тіршідігін қамтамасыз ететін ұйым қызметкерлері; азық-түлік, медициналық өнімдер мен тұрмыстық тауар таситын көліктер; Тараз қалалық шұғыл штабы берген анықтамасы бар тұлғалар; үйіне қайтқысы келетін өзге өңір тұрғындары мен басқа аймаққа медициналық көмек алу үшін баратындар ғана қатынай алады. Қоғамдық көлік 7:00-ден 20:00-ге дейін жұмыс істейді. Тұрғындардың аса қажеттілік болмаса қала ішін еркін кезуіне тыйым салынған. Сонымен қатар, отбасы мүшелерін қоспағанда, үш адамнан артық топтасуға және кәмелетке толмағандардың ересектерсіз жүруіне болмайды. Көлікті қорғаныс құралдарынсыз басқаруға да рұқсат жоқ. Көптеген мекемелер жабылды, тек қала тіршілігін қамтамасыз ететін ұйымдар мен кәсіпорындар ғана жұмыс істеуде.
Батыс Қазақстан облысы
Мұнда карантин 30 наурызда жарияланды. Ем алуға баратын адамдарды қоспағанда, Атырау және Ақтөбе облыстарына қарай жолаушы тасымалдауға тыйым салынған. Басқа аймақ тұрғындарының БҚО аумағына кіруіне рұқсат жоқ. Ал жергілікті тұрғындар Атырау және Ақтөбе облыстарына тек автобуспен бара алады.
Қарағанды облысы
30 наурыз 00:00-ден бастап Карағанды, Абай, Саран, Шахтинск және Теміртауда карантин режимі енгізілді. Қауіпсіздік шаралары күшейтіліп, тұрғындардың тек азық-түлік дүкеніне, дәріханаға және жұмысқа баруына рұқсат берілді. Көптеген кәсіпорындар мен ұйымдар жабылып, 13 блокбекет қойылды. Қарағанды арқылы транзиттік көліктер Алматы — Екатеринбург жолымен шығыс айналма жолына бағыт алады. Қызылорда — Павлодар тас жолында Бидайық ауылына жақын жерге көліктерді Ақсұлу жаққа Алматы — Екатеринбург тас жолына бағыттайтын қосымша жасақ қызмет етуде.
Маңғыстау облысы
Өңірде індетке қарсы шектеу шаралары 30 наурызда енгізілді. Мұнда қоғамдық көлік 8:00-ден 19:00-ге дейін қозғалады. Қалааралық бағыттағы қоғамдық көліктердің қозғалысы уақытша шектелген. Жеңіл көліктерге әзірше тыйым салынған жоқ, бірақ қала тұрғындарына аса қажеттілік болмаса көше кезбеуге кеңес берілді.
Қостанай облысы
31 наурызда облысқа кіретін жолдар жабылып, он өткізу бекеті орнатылды. Онда полицейлер мен дәрігерлер қызмет етуде. Аймақта Ақмола, Солтүстік Қазақстан, Қарағанды, Ақтөбе облыстарына қатынауға уақытша шектеу қойылды. Тек медициналық көмекке мұқтаж жандар ғана өте алады. Қалааралық автобустар да жұмысын тоқтатты. 2 сәуірден бастап өңірде қоғамдық көлікте бетпердесіз жүруге тыйым салынды. Жүргізушілер де бетперде тағып, қолғап киюге міндеттелді. Тәртіптің сақталуын полицейлер қадағалайды. Таксиге екі адамнан артық отыруға болмайды және бәрі бетперде тағуы тиіс, ал жүргізушіде қолғап болуы керек. Екі адамнан көп жолаушы алып жүрген жеке көліктер тексеріледі. Бұл жағдайда жүргізуші олардың өз жақындары екенін дәлелдеуі қажет.
Қызылорда облысы
Шектеу шаралары мұнда 31 наурызда күшіне енді. 1 сәуірден бастап теміржол жұмысын тоқтатты. Қала билігі тұрғындарды шектеу режиміне бағынып, үйден шықпауға шақырды. Ереже бұзғандар қатаң жазаланады.
Солтүстік Қазақстан облысы
Бұл өңірде карантин режимі 1 сәуірде енгізілді. Петропавлдан аудандарға жолаушы тасымалдауға қатаң тыйым салынды. Блокбекеттерде полицейлермен бірге дәрігерлер және ветеринарлық, санитарлық-эпидемиологиялық қызмет мамандары еңбек етуде. Түнгі уақытта тек қала тіршілігі үшін аса маңызды тауарларды таситын көліктердің ғана жүруіне рұқсат берілген. Азаматтардың қала аумағынан аса қажеттіліксіз шықпауына кеңес берілді, әрі жеке куәлігін алып жүруі тиіс.
3 сәуірде Петропавл да карантинге жабылды. Мұнда автокөлік қозғалысы толық тоқтатылды. Кәсіпорындар мен ұйымдар жабылып, қала тұрғындарының қозғалысы шектелді. Олардың көрші-қолаң мен туған-туыстарының үйіне баруына тыйым салынған. Кәмелетке толмағандардың ересектерсіз жүруіне болмайды, ал 65 жастан асқандардың үйден шықпауына кеңес берілді.
Павлодар облысы
1 сәуірде шектеу шаралары енгізіліп, 9 блокбекет қойылды. Жолаушы тасымалына тыйым салынды. Тұрғындардың қоғамдық орындарға баруына шектеу қойылып, түнгі 22:00-ден кейін жақын маңдағы азық-түлік дүкені мен дәріханаға, медициналық мекеме мен жұмысқа баруға ғана рұқсат берілді.
Түркістан облысы
Мемлекеттік комиссияның шұғыл штабының шешімімен 3 сәуірден бастап тұрғындардың тек азық-түлік, дәрі-дәрмек алу және жұмысқа бару үшін ғана үйден шығуына рұқсат берілді. Облыс, аудан, қала арасында жолаушы тасымалдауға тыйым салынып, автовокзалдар уақытша жұмысын тоқтатты. Қоғамдық көлік тек 6:00-ден 20:00-ге дейін жүреді. Азық-түлік дүкендері мен дәріханалар 09:00-ден 20:00-ге дейін, базарлар 10:00-ден 17:00-ге дейін, жанармай құю бекеттері, банктер мен жеке нотариустар 10:00-ден 16:00-ге дейін, сұлулық салондары мен ТЖО 10:00-ден 18:00-ге дейін жұмыс істейді. Қалалар мен елді мекендерде дезинфекциялық жұмыстар жүргізілуде.
Комментариев: 0