Porsche Panamera мен Taycan бір топтамаға енеді

Porsche бір-екі базалық моделін шығарып, олардың бірқатар түрленімін ұсынатын заман артта қалған, қазір фирманың гаммасы кәдімгідей кең, атап айтқанда, онда екі есікті 911 мен 718-нің бірнеше нұсқасы, Panamera фастбэгі, Cayenne, Macan кроссоверлері және батареялы Taycan бар.

Бренд Taycan-ға айрықша үміт артқан, ол электромобильдер топтамасының флагманы атануы керек еді. Алайда саудасы жүрмей қалып, компания басшыларына даму стратегиясын қайта қарауға тура келді. Autocar болашақ электрлі көліктерге арнап платформа әзірлеу ісіндегі кідіріс салдарынан 1.8 миллиард еуро жоғалтқан марка енді ақша үнемдеуге күш салады деп жазды.

Басылымның дереккөзі Panamera мен Taycan-ды меңзеп, күштік құрылымы әртүрлі, бірақ шанағы ұқсас машиналар бір топтамада болады депті.

Сұраныс жағынан Panamera моделі Taycan-нан жоғары тұр: былтыр дәстүрлі қозғалтқыш алған 27 701 автомобиль сатылса, электрокардың небәрі 16 339-ы өткен.

Екеуі де бастапқыда өз шассиін сақтап қалады. Panamera-ның 2023 жылдан бері шығап жатқан үшінші буыны Porsche MSB платформасын алса, 2019 жылы конвейерге тұрған Taycan тек электромобильге арналған J1-ге негізделген.

Porsche бір модель ішіндегі параллель архитектураларды алғаш рет топтап отырған жоқ. Біраз уақыт бұрын шассиі әртүрлі Macan мен Macan Electric-ті, кейін Cayenne мен Cayenne Electric-ті дәл осылай біріктірген.