«Жол жүрісі туралы» заң мен Әкімшілік кодекске қосылған мопедті тіркеуге міндеттеп, жүргізуші куәлігінсіз скутер мінуге тыйым салатын, ереже бұзған мопедшілерге айыппұл салуды көздейтін бірнеше норма 5 сәуірде күшіне енеді. Бірақ тәртіп сақшылары ертерек қамданып, мопедтерді 20 қаңтарда есепке қоя бастады.
Жергілікті полиция департаменті берген мәлімет бойынша қазір Алматыда 2013 мопед нөмір алған. Басқа өңірлерге қатысты ақпарат жоқ, соған қарағанда тіркелген көлік саны аз сияқты. Оңтүстік астанада 50 мыңға жуық скутер жүргенін ескерсек, бұл іс тым баяу жүріп жатқаны сезіледі.
Полицейлер 5 сәуірден кейін мопедін тіркемеген және А1 категориялы куәліксіз скутер басқарған жүргізушілерді жазаға тартып, техникасын айыптұраққа жіберетінін ескертті.
Нөмірсіз немесе тіркелмеген скутер мінген азамат 10 АЕК (39 320 теңге) айыппұл арқалайды. Жалған нөмір орнатса, ел қазынасына 15 АЕК (58 980 теңге) құяды, жүргізуші куәлігінсіз жүргендер 5 АЕК (19 660 теңге) төлейді.
Комментариев: 0