Polestar 10 минутта қуатталатын электрокарын көрсетті

Марка Polestar 5 прототипімен бірге өте жылдам қуаттау технологиясын көрсетті: электрокар батареясы небәрі 10 минутта 10-нан 80 %-ға дейін қуат алады. Бұл зертханада емес, автомобильде жасалған алғашқы тәжірибе.

Прототип израильдік StoreDot фирмасының Extreme Fast Charging (XFC) технологиясы бойынша жасалған 77 киловатт батареямен жүреді. Аккумуляторда графиттің орнына кремний қолданылған. Әзірлеушілер бұл батареяның энергия сақтау тығыздығы мен қызмет ету мерзімін арттыратынын айтты.

Polestar жасаған сынақ технологияның тиімді екенін ғана емес, аккумуляторды электрокар құрылымына біріктіруге болатынын және қуаттау құрылғысымен өзара әрекеттесе алатынын дәлелдеді. Бірақ машинаны мұндай жылдам қуаттау үшін кемінде 350 кВт қуаты бар тұрақты ток станциясы қажет.

Polestar басшысы Томас Ингенлат StoreDot өнімінің арқасында электрокарды қуаттау уақыты қысқарып, дәстүрлі моторы бар машинаға жанармай құюға кететін уақытпен шамалас болатынын айтты.

Polestar-мен қатар Қытайдың CATL фирмасы да жаңа батареясын көрсетті. Әзірлеушілер Shenxing Plus итий-темір-фосфатты аккумуляторы энергия қорын секундына километр жылдамдықпен толтыратынын айтты, яғни, 600 км жүруге жететін энергияны небәрі 10 минутта толтырады. CATL өкілдері Shenxing Plus батареясы электрокарлардың жүріс қорын 1000 шақырымға жеткізеді деп болжап отыр.