Dacia Румынияда Duster кроссоверінің жаңа түрленіміне тапсырыс қабылдап жатыр. Romturingia ательесінің мамандары машинадан шағын жүк платформасы бар төрт есікті пикап әзірледі. Пикап «Дастердің» үздік комплектациясынан ғана жасалады. Ерекше түрленімінің бағасы 26 000 еуродан (16.5 млн теңге) басталады.
Romturingia ательесі бұған дейін де бірінші буындағы «Дастерді» жүк көлігіне айналдырып, сынап көрген, бірақ ол жүк платформасы үлкен екі орынды пикап болды. Бұл жолы тюнерлер кроссовердің стандарт жүксалғышының орнына қатты пластик панельмен қапталған жүк бөлігін жасады. Оның өлшемі — 1.05×1 метр.
Шеберлер Duster-дің төбесін артқы диванның тұсынан бастап алып тастап, салон мен шанақ арасына қалқа орнатты. Мұндай автомобильге небәрі 430 келі жүк сыяды.
Жаңа өнімнің базалық нұсқасы 130 ат күшіне ие 1.2 литрлік моторы бар жұмсақ гибрид күштік құрылыммен жүреді. Мұндай машина алты сатылы механика және толық жетекті жүйемен жұмыс істейді. Ал 140 ат күшін беретін қуаттырақ көлік тек алдыңғы жетекті болады әрі 1.6 литрлік атмосфералы мотор және электромотормен жабдықталады.
Бұған дейін Бразилияда «Дастерге» негізделген бес орынды пикап жарық көрген. Кроссовердің бірінші буынына негізделген техника Renault Oroch деп аталады. Конверсия барысында «Дастердің» дөңгелек базасы ұлғайып, біршама ұзарды.
Комментариев: 0