508 нөмірлі седан мен 508 SW универсалының атауында PSE (Peugeot Sport Engineered) қосымшасы бар спорттық түрленімі марка тарихындағы ең қуатты автокөлік атанды. Рекордқа жету үшін француздар гибрид құрастырған.
Гибрид құрамында 200 ат күшін беретін 1.6 литрлік турбиналы EP6 мен екі электромотор бар. Жалпы 360 ат күші мен 520 Нм айналу моментін беретін күштік құрылым 8 сатылы автоматпен жұмыс істейді. Машина алғашқы жүздікті 5.2 секундта еңсереді, ал ең жоғары жылдамдығы — сағатына 250 шақырым.
Седан мен универсалдың салмағы 1850 және 1875 кг, жылдамдықтары да шамалас. Қос көліктің жүріс қоры 42 шақырымға жетеді. Сыйымдылығы 11 кВт/сағ батарея Wall Box жүйесімен (бөлек сатып аласыз) екі сағат, ал тұрмыстық рәзеткі арқылы жеті сағат қуатталады.
Машинаның іші Nappa былғарысымен, алькантарамен қапталған, алюминий мен ағаштан жасалған бөліктер де жоқ емес.
Peugeot 508 PSE иесі атанғысы келетіндер қазан айынан бастап тапсырыс бере алады, жеткізу 2021 жылы басталады. Бағасы әзірше белгісіз, бірақ 50 мың еуродан жоғары болатыны анық. Еуропада ол Audi S4, BMW M340i және Mercedes C43 AMG-мен бәсекелеседі. Peugeot Қазақстан нарығынан жыл басында кеткен, сондықтан жаңа машинаның бізге келмейтіні белгілі.
Комментариев: 0