Жарыс көлігі сериялық деп есептелуі үшін арнайы жасалатын нұсқаларға коллекционерлер мен жылдам жүруді ұнататындар арасында сұраныс жоғары. Осындай модельдердің бірі үш есікті Peugeot 205 Turbo 16 хетчбэгі. Қырық жыл бұрын небәрі 200 данасы жарық көрген.
Жалпы жолға арналған барлық 205 Turbo 16 сұр түсті және бүйірінде қызыл жолақ бар. Автомобиль 1.8 литрлік турбоқозғалтқышпен жабдықталған. 4 цилиндрлі мотор 197 ат күшін (255 Нм) 5 сатылы механикалық қорап арқылы төрт дөңгелекке береді. Көрсеткіштері аса керемет болмаса да, ұзындығы 3.7, ені 1.6 метр болатын машинаның салмағы бір тоннаға жетпейді.
205 Turbo 16 өте жоғары динамикасымен стритрейсерлерді де, ралли жүргізушілерін де қызықтырды. Бұл модель ралли жарысында 1985 және 1986 жылдары екі рет қатарынан «Б» тобында чемпион атанған.
Bonhams аукционында тамызда бәссаудаға түсетін Peugeot 205 Turbo 16 небәрі 3216 км жүрген. Бұрынғы иесі оны толықтай қалпына келтіріп, көп қаражат жұмсапты. Сондықтан 250–350 мың доллар сұрайтын сияқты. Бұл сомаға жаңа Ferrari 296 GTB алуға болады.
Комментариев: 0