Өзбекстанда жол ережесін бұзғандар айып балын алады

Өзбекстан президенті Шавкат Мирзиёев жол ережесіне айып балы жүйесін енгізу туралы заңға қол қойды. Gazeta.uz елдің әділет министрлігіне сілтеме жасап хабарлағандай, белгілі бір құқық бұзушылық үшін жүргізуші негізгі жазадан бөлек айып балын алады. Бірақ бір ереже бұзған жағдайда көп дегенде 2 балл ғана беріледі.

Айып балдары жыл сайын жаңарып отырады. Жүргізуші 12 айда 12 балл жинаса, алты айдан үш жылға дейін көлік тізгіндей алмайды. Мерзімі қандай жағдайда өзгеретіні әзірленіп жатқан қосымша актілерде көрсетіледі. Құжатта ереже бұзғанына байланысты қанша балл берілетіні жазылады.

Қандай жағдайда айып балы берілетіні қазірдің өзінде белгілі. Мысалы, техникалық ақауы бар көлікті жүргізу немесе мемлекеттік нөмірсіз, жаяу жүргіншілер жолымен жүру және жол белгілерін елемеу, жылдамдық асыру, бағдаршамның қызыл түсіне өту, аялдау ережесін бұзу және т.б. үшін айып балы беріледі. Тіпті жүргізуші кептелісте себепсіз дыбыс сигналын пайдаланса, балл алуы мүмкін.

Барлық айып балы E-jarimaball жүйесінде тіркеледі. Жүргізуші 8 балл жинаса, SMS арқылы ескерту алады. Ал 12 балдан асқан кезде тағы бір рет ескерту жасалып, жүргізуші куәлігінен уақытша айырылады. Мысалы, бағдаршамның қызыл түсіне өту — 1.5 балл, ал жылдамдықты асыру — 0.5-2 балға дейін бағаланады.

Қазақстанда да айып балы жүйесін енгізу мәселесі бірнеше рет көтерілген. ІІМ бұған әлі ерте деп есептейді және оны жан-жақты зерттеу қажет екенін алға тартады. Билік ереже бұзбайтын жүргізушілерге жеңілдік жасауды ұсынып отыр. Бірақ айыппұлды 50 % жеңілдікпен төлеу ережесін алып тастамақшы.

Қандай шаралар еліміздегі жүргізушілерді тәртіпке салады деп ойлайсыз?