Өзбекстанда тұрмыстық кондиционері бар Damas жүр

Сол шақта үй қабырғасына ілуге арналған ішкі және сыртқы блоктары бар ауа баптағыш орнатып алған микровэн көзге түсті.

Көлік иесі сплит-жүйенің сыртқы блогын артқы есікке іліп қойған, ішкі бөлігі соңғы қатардағы орындықтардың артында тұр. Avtoelon.uz жүйе қалыпты жұмыс істеп тұр деп жазды. Әлеуметтік желіде біреулер жүргізушіні мақтап жатса, енді бірі бұл қауіпті болуы мүмкін деп сөкті.

Бұрын Damas (ол кезде Daewoo еді) зауытта кондиционермен жабдықталатын, бірақ кейін өндіруші одан бас тартты. UzAuto климатты баптайтын құрылғы көліктің бағасын шарықтатып, 38 ат күшін беретін мотордың динамикасына кері әсер етеді деп ұйғарыпты. Сөйтіп ми қайнатар ыстық болатын елде тіршілік ететін жұрт үшін аса қажет опция күшін жойды.

Жүргізуші де, жолаушы да салон жайлы болғанын құп көретіні анық. Көлік иесінің бұл әрекеті әзіл сияқты көрінгенімен, халық қолайсыз ауа райында амалдаудың амалын табатынын көрсетеді.

Басылым дәл сондай кондиционері бар «Гелендваген» ел назарына іліккенін атап өтті. Бірақ тұрғындар мұны қондырғы шығаратындардың жарнамасы деп санайды. G-Class-тағы климат-бақылау жүйесі араб жерінде де салонды жақсы салқындатады.