Өзбекстан Damas-ты конвейерден алады

Damas-тың орнын басқа заманауи автомобиль басады деп жазды Autoelon.uz. Мемлекет басшысының тапсырмасын орындау мақсатында 2026 жылы 7 орынды жаңа бюджеттік минивэн жарық көреді. Ол үшін өндіруші шамамен 100 млн доллар инвестиция құяды.

«Дамастың» ізбасары қандай модель болатыны анық емес, жүк тасуға арналған Labo түрленімінің болашағы да беймәлім. Машинаның Еуро-5 санатына сай келетін бензинді мотормен жүретіні ғана белгілі. Жаңа өнімді қазір Damas шығаратын Хорезм облысындағы UzAuto Motors зауыты құрастырады.

Damas қатардан қалады деген жаңалық Өзбекстан автонарығын дүр сілкіндірді, өйткені ол өзбек автоөнеркәсібінің ардагері әрі елдегі ең арзан автомобиль саналады. Ескі, қауіпті болғанымен, оған сұраныс «Кобальттан» кем емес! Вэн Өзбекстанда 7.5 мың доллар тұрады.

Модельдің ізбасары да арзан бола ма?

1985 жылғы Suzuki Every-дің көшірмесі саналатын Damas Өзбекстанда 1996 жылдан бері шығады. Коммерциялық кей-кар Орта Азияда жақсы сатылды.

Kolesa.kz-тің Damas-пен байланысты жобасы көпке таныс. 2021 жылы редакцияның YouTube-арна редакциясы эксперимент ретінде стандарт Damas-қа электромотор орнатқан.