Өткен демалыста АИ-95 бензині тапшы болды

Әлеуметтік желіде Қарағанды — Балқаш, Астана — Павлодар тас жолдары мен елдің батыс өңіріндегі бекеттерде АИ-95 маркалы бензиннің жоқтығына жүргізушілер шағымданды. Кейбір станция АИ-95-ке шектеу қойып, бір көлікке 30 литрден артық сұйық отын сатпаған, ал АИ-98 тек талон арқылы саудаланды.

Жүргізушілер «Бензин қайда? Енді көлікті итереміз бе? Сағаттап кезекте тұрмыз!» деп наразы болды және жанармай бекетінің маңындағы көлік кезегін видеоға түсірді.

View this post on Instagram

A post shared by КАРАГАНДА / KARAGANDA / 09 (@karaganda_vkurse)

Энергетика министрлігі Kolesa.kz редакциясына Қарағанды облысында жағдайдың қалыпқа келгенін хабарлады.

«Кейбір бекетте, әсіресе Балқаш бағыты бойынша соңғы күндері АИ-95 маркалы бензинге сұраныс уақытша күрт артты. Бұған осы маусымда туристік және транзиттік көлік ағыны себеп болды. Сұраныстың орнын толтыру үшін бекітілген жоспардан тыс қосымша жанармай жедел түрде жібердік.

Өңірде жанармай қоры жеткілікті, тіпті ел бойынша ең жоғары көрсеткіштердің бірі осында. 8 шілдедегі жағдай бойынша қор төмендегідей:

• АИ-92 — 25.6 мың тонна (40 күнге жетеді);
• АИ-95 — 8.5 мың тонна (54 күнге жетеді);
• дизель — 41 мың тонна (35 күнге жетеді).

Қазір Қарағанды облысындағы барлық жанармай бекеті қалыпты режимде жұмыс істеп тұр және олар толық көлемде жанармаймен қамтылған. Жағдай Энергетика министрлігі мен облыс әкімдігінің тұрақты бақылауында», — деді ведомствода.

Министрлік жақында басқа өңірлердегі жағдай бойынша ақпарат беруге уәде етті.

Жыл басынан бері Қазақстанда бензин бағасы өсіп келеді. Маусым қорытындысы бойынша АИ-92 литрі Алматы мен Астанада 217 теңгеге жетсе, АИ-95 республика бойынша 271–275 теңге аралығында сатылып жатыр.