Бірінші оқиға 22 қаңтар күні 18:00 шамасында Павлодар — Қызылорда тас жолының 1293-шақырымында болды. Полицейлер берген мәліметке сүйенсек, ВАЗ-2110 тізгіндеген таксист тас жолда сәл кідіргенде оған Toyota Camry соғылған. Қатты соққыдан аударылып қалған машинадағы кісілер өз күшімен шыққанмен, оларды Mercedes-Benz GL 450 қағады. Апат болған сәтті өтіп бара жатқан куәгер түсіріп алыпты.
«Лада» жүргізушісі оқиға орнында жан тапсырды. Алты адам жарақат алды.
Сол күні 23:30 шамасында Алматыдағы Әл-Фараби даңғылында 19 жастағы Chevrolet жүргізушісі жоғары жылдамдықта қарсы бетке шығып кетіп, Toyota Camry-ді іле кеткен де, артынша Toyota Tundra-ға соғылған. Жас жігіт пен жасы шамалас екі жолаушы тілге келместен көз жұмды.
Демалыс күні Әл-Фараби мен Дулати қиылысында Kia Rio темір қоршауға соғылды. Дулати көшесімен төмен қозғалып бара жатқан машина тайғақ жолда жүрісінен жаңылған. Жүргізуші дәрігерлер келгенше қайтыс болды.
Тағы бір сұмдық апат оңтүстік астанадағы Рысқұлов даңғылында болды. Mercedes-Benz Е-класс (W210) жолды бөліп тұрған қоршауға соғылды. Апат 18 қаңтар күні болған, бірақ ол туралы мәлімет алдыңғы демалыста жарияланды. Седанды біреу арт жақтан қағыпты, салдарынан Mercedes көпір қоршауына соғылады. Темір шанақты тесіп өтіп, салонға кіріп кеткен. Дәрігерлер жүргізушінің аяғын кесуге мәжбүр болды.
Комментариев: 0