Аустралиядағы Lloyds аукционында жалпы жолға шығатын Holden рекордтық бағаға өтті. HSV бөлімшесі жасаған GTSR W1 Maloo жер бетіндегі жалғыз ғана емес, «су жаңа» машина. Себебі 2017 жылдан бері небәрі 26 км жүрген. Көліктің жаңа иесі 1.2 млн Аустралия долларын (406 млн теңгеден асады) санап беріпті.
2017 жылы GM құрамына кіретін Holden фирмасы Commodore седанының арнайы нұсқасын көрсетті. GTSR W1 индексті автомобильдің конвейерден түсуіне орай жарық көрген оны ерекше еткен 644 ат күшін беретін 6.2 литрлік V8 еді. Агрегаттың арқасында ол Аустралиядағы ең қуатты сериялық автомобиль болды. Кәсіпорын осындай 295 авто құрастырды.
Кейін фирма дәл сондай мотор, спорттық аспа және жақсарған тежеуіш алған Maloo түрленімін әзірледі. Компания 4 пикап жасап, тек маңызды клиенттеріне сатты.
GTSR W1 Maloo моделінің бірі желтоқсанның аяғында иесін ауыстырды. Бұл – айрықша Holden Yellah түсіне боялған жалғыз пикап. Әу баста спорткар ашық аукционда саудаланып, құны 1.1 млн долларға жеткен, алайда иесі мұны азсыныпты. Бәссауда өткен соң ұйымдастырушы үміткерлердің бірімен келіссөз жүргізіп, бағаны сатушының көңілінен шығатын деңгейге көтерген.
Holden модельдері ішінде ең қымбаты — трек машинасы. Әйгілі Bathurst жарысында екі рет жеңіске жеткен автомобиль 2018 жылы 2.1 миллион долларға (711 млн теңге) сатылған.
Комментариев: 0