Оқиға 1 қыркүйекте болды. Yk-news.kz хабарлағандай, апатқа үш күн бойы жауған жаңбыр себеп болған, жауыннан Үлбі өзеніндегі су деңгейі көтеріліп, көпір тірегі бүлінген. Қазір оқиға орнында әкімдік пен коммуналдық қызмет өкілдері жұмыс істеп жатыр.
Адамдар бұл асфальтты «Гаваньға баратын көпір» немесе «Шнейдеров көпірі» деп атайды. Ал нысанның ресми атауы «Үлбі металлургиялық зауыты» АҚ аумағындағы Үлбі өзенінен өтетін көпір. Бұл көпірмен жүретін көлік саны көп емес. Абырой болғанда, апаттан ешкім зардап шеккен жоқ.
Кейінгі бірнеше жылда осы нысанды жөндеуге жүздеген млн теңге жұмсалған. Әу баста жұмысқа бұрынғы қала басшысы, қазір ШҚО әкімінің орынбасары болып отырған Жақсылық Омар жетекшілік етті. Жөндеу жұмысы кезінде ол тікелей трансляция жүргізіп, барлығы бақылауда екенін айтқан.
Қазіргі Өскемен әкімі Алмат Ақышев көпірді тез арада қалпына келтіруге уәде беріп отыр.
«Жағдайға баға беру үшін Алматыдан мамандар шақырдық. Мұнда екі жыл жөндеу жұмысы жүріп, 600 млн теңге жұмсалған. Тексереміз, мердігерлер бар, олар кепілдік міндеттемесі бойынша көпірді қалпына келтіреді», — деді қала басшысы.
Комментариев: 0