Өскемен тұрғыны зақымданған көлігі үшін өтемақы алды

Биыл 4 сәуірде Өскемен тұрғыны Арман Қайгеревке тиесілі Honda Civic-тің үстіне шіріп тұрған терек құлап, қатты бүлінген. Осыған байланысты иесі коммуналдық қызметті сотқа берді.

Inbusiness.kz хабарлағандай, сарапшылар автомобильді жөндеу тиімсіз деді. Себебі жөндеу құны 3.4 млн теңге болады, дәл осындай көліктің нарықтағы бағасы 2.5 млн теңге шамасында.

Сот ағаш жол жиегіндегі қалалық аумақта өскенін анықтады. Мұндай ағашты кесу және жою жұмыстарына Өскемен қаласындағы тұрғын үй-коммуналдық шаруашылығының жолаушы көлігі және автомобиль жолдары бөлімі жауапты, ал көшені күтіп ұстау міндеті «Таза Өскемен» коммуналдық мемлекеттік кәсіпорнына жүктелген.

Сот отырысында зардап шеккен кісінің адвокаты құлаған ағаш коммуналдық кәсіпорын қызмет көрсететін аумақта тұрғанын және тиісті жұмыстар уақытылы жүргізілмегенін дәлелдеді.

Азаматтық талап-арыз материалдарында «Келісімшарттың (2.3-тармақ) ажырамас бөлігі болатын техникалық сипаттамаға сәйкес мердігер тәулік бойы жол мен қала инфрақұрылымының жағдайын тексеріп, қауіпті, тұрақсыз немесе бұзылып жатқан жерлерді дереу анықтап, қажет шараларды (шұңқырларды жабу, бұтақ кесу және ортақ аумақтағы құлайын деп тұрған ағаштарды кесу, қоқыс жинау, жолдағы ірі заттарды және ортақ аумаққа құлау қаупі бар өзге де заттарды алып тастау) қолдануға тиіс. Мұндай жерлер анықталған жағдайда аумақты қоршап, уәкілетті органға хабарлау керек», — деп жазылған.

Сот залалды «Таза Өскемен» өтеуге тиіс деп, компанияны 2 418 250 теңге (көліктің нарықтағы құны) және сот шығындары үшін 248 508 теңге төлеуге міндеттеді.

Өскемен қаласындағы тұрғын үй-коммуналдық шаруашылығының жолаушы көлігі және автомобиль жолдары бөліміне қатысты материалдық шығынды өндіру талабын сот қанағаттандырған жоқ.