Қазан айының аяғында Қытайда Lixiang Mega батареялы вэні жүріп бара жатып тұтанып, түгі қалмай өртеніп кетті. Құқық қорғаушы органдар оқиғаға қатысты пікір білдірген жоқ, бірақ Li Auto өз ішінде тергеу жүргізіп, сервистік кампания жариялады. Мамандар былтыр 18 ақпан мен 27 желтоқсан аралығында шыққан 11 411 электрокардың бірнеше компонентін ауыстырады.
Машинаның отқа орануына Li Mega күштік құрылымындағы салқындатқыш сұйықтық себеп болуы мүмкін. Оның құрамы дұрыс емес екен, салдарынан жүйе элементтерін тат басып, сұйықтық ағып кетеді, техниканың қуаты кеміп, аккумулятор артық күш жұмсайды, нәтижесінде көліктен от шығуы ықтимал. Компания арнайы орталыққа барған модельдердің батареясын, мотор контроллерін және қауіпті сұйықтықты ауыстырады. Кепілдік мерзімін де ұзартады.
Li Mega 102.7 киловаттық CATL аккумуляторымен жабдықталады, бренд өкілдері елді шошытқан апатқа батареяның қатысы жоқ деп мәлімдеді. Өндіруші қазір жолда жүрген барлық вэннің техникалық жағдайын тексеріп жатыр. Жүргізуші борт электроникасынан хабар алса, дереу тоқтап, құтқарушыларды шақыруы керек. Lixiang фирмасының өзге өнімдерінен және басқа уақытта шыққан Mega вэндерінен ондай кемшілік табылмаған.
Комментариев: 0