Nissan соңғы GT-R-ді құрастырды

Биыл Nissan әйгілі моделін тек өз отанында жасап, сатты. Алайда 26 тамыз күні автоөндіруші Тотиги префектурасындағы зауыт GT-R-дің соңғы экземплярын шығарғанын хабарлады. Midnight Purple реңкті T-Spec нұсқасы R35-тің 18 жылға жалғасқан тарихына нүкте қойды.

1 / 4

1 / 4

Марка бұл модельді алғаш рет 2007 жылы Токиода өткен автосалонда көрсеткен. Кейін бірнеше мәрте жаңарып, іші-сырты біршама өзгерді және қуаты артты. Әу баста VR38DETT индексті 3.8 литрлік турбомотор 480 ат күшін берсе, 2025 жылы машинаның стандарт нұсқасы — 570 а.к., Nismo — 600 а.к., саны шектеулі GT-R50 720 ат күшін беретін агрегатпен жабдықталды.

1 / 18

Nissan GT-R (2007–2010)

1 / 18

Ұзақ ғұмырында Nissan GT-R біраз жетістікке жетті. 2007 жылы Нюрбургринг трассасында ең жылдам автомобиль атанса, 2009 жылы 4 орынды спорткар рекорд орнатты, 2013 жылы «Нордшляйфеде» көрсеткішін жақсарта түскен, ал былтыр GT-R Nismo тайм-аттак жанкүйерлеріне жақсы таныс «Тсукуба» айналма жолында тағы жоғары нәтиже көрсетті.

GT-R спортта да қалыс қалған жоқ. Модельдің жарысқа қатысатын түрлері GT500 класында Жапонияның Super GT сериясында бес мәрте, GT300 класында үш мәрте жеңімпаз болса, 2013 жылы Blancpain GT Series-те, 12 сағаттық Bathurst марафонында ешкімге дес бермеді. Super Taikyu жарысында бес титулға қол жеткізді. 2016 жылы Масато Кавабата 304.96 км/сағ жылдамдықта дрифт жасап, әлемдік рекорд тіркеді.

Nissan Skyline GT-R тюнерлердің назарынан тыс қалмаған. 18 жылда әлем автомобильдің алуан түрін көрді. Оларды көрмеден де, жарыс жолынан да кездестіруге болады. Айтпақшы, шеберлердің қолы тиген аса қуатты кейбір модельдегі агрегаттың бойында 3500 арғымақтың күші бар.

1 / 12

Scribante Racing жасаған Nissan GT-R

1 / 12

Компания осы уақытқа дейін 48 мың Nissan GT-R жарық көргенін атап өтті. Оның 37 %-ын жапондар алыпты. Біздің елде бұл модель ешқашан ресми сатылмаған. Десе де жолда жүргендері аз емес. Бағасы 31 млн теңгеден басталып, 105 миллионға дейін барады.

Комментариев: 0