Nissan қытай платформасына негізделген кроссовер жасап жатыр

Қытайдағы жағдайын жақсарту үшін Nissan компаниясы Dongfeng брендімен етене араласып, бірге еңбек етіп жатыр. Осындай кооперацияның алғашқы жемісі — N7. Батареялы седанға Dongfeng eπ 007 донор болды. Машина жергілікті халыққа ұнап, топтама N6 индексті гибридпен толықты. Енді Nissan гаммаға кроссовер қосуды көздеп отыр.

Камуфляжды прототиптің фотосы желіде тараған соң кейбір басылым N8 индексті модель 5 метрлік Dongfeng eπ 008-дің агрегатын алатын шығар деп топшылады.

Қытай кроссовері былтыр шыққан, оны марка электромобиль ретінде де, тізбекті гибрид ретінде де ұсынды. Біріншісі 220-540 ат күшін беретін бір не екі мотормен жабдықталады және 620 км-ді еркін еңсереді. Бензинэлектрлі нұсқасының бортында 1.5 литрлік іштен жанатын қозғалтқыш, 220 ат күшіне ие электромотор және 28.39 кВт·сағ батарея тұрады. Көлік электр көмегімен 200 км жүреді, ал жалпы жүріс қоры 1200 шақырым шамасында.

Марка прототипті аса қатты бүркемегеніне қарағанда, жаңа модель жолға шығатын күн алыс емес сияқты. Қытай Өнеркәсіп министрлігінің арқасында дизайны мен сипаттамасына қатысты мәліметті одан бұрын алуымыз мүмкін.