«Москвич» электромобилі тым қымбат тұрады

«Москвич 3е» электрокроссвері 3.5 млн рубльге (23.4 млн теңге) бағаланған, ал оның бензинді нұсқасы 1.97 млн рубль (13.2 млн теңге) тұрады. Ресми бағасы әлі жарияланбады, мәліметті ТАСС агенттігіне сатушылардың бірі беріпті.

Дилерлік орталық қызметкерлері бұл өндіруші бекіткен баға екенін атап өткен, сатушы үстінен әлі ақша қоспапты.

Көлік типін мақұлдау құжатындағы дерек бойынша «Москвич 3е» аса қуатты емес. Алдыңғы оське қойылатын жалғыз электромотор 68 ат күшіне ие. Төменгі бөліктегі бірнеше аккумулятор 410 шақырым жүруге мүмкіндік береді.

Жабдықталуы жағынан бензинді «Москвичтен» алыс кетпейтін сияқты. Кроссоверге диодты оптика, 17 дюймдік дөңгелек, төбесіне рейлинг орнатады. Салонында 10.25 дюймдік экраны бар алты динамикті медиажүйе, артқы көрініс камерасы, климат-бақылау мен арттағы жолаушылар қолданатын USB-порт болады.

Компания жоспары бойынша «Москвич» жыл аяғына дейін 200 электрокроссовер құрастыруға тиіс, ал 2023 жылы олар жалпы өнімнің 20 % -ын құрайды, яғни 50 мың машинаның 10 мыңы электрлі болады. Қазір Ресей билігі қарастырып жатқан 2035 жылға дейінгі автоөндірісті дамыту стратегиясында елдегі электрокар үлесін 25 %-ға дейін арттыру қажет екені жазылған, көбін жергілікті зауыттар өндіруге міндетті.