Күн жылынғалы А және А1 категориясындағы жүргізуші куәлігін алғысы келетіндер көбейіп келеді. Бірақ көп адам үшін бұл оңайға соқпай тұр. «31 арна» хабарлағандай, «Азаматтарға арналған үкімет» дерегі бойынша жыл басынан бері А санатындағы (мотоцикл) теориялық емтиханды 1297 адам сәтті тапсырып, 1056 үміткер сынақтан өте алмапты. Ал А1 санатындағы (мопед) жүргізуші куәлігін алғысы келген 603 кандидат қана теориядан өте алған, 592 адам (курсантардың шамамен 50 %-ы) сынақтан сүрініпті. Олар жүргізуші куәлігін сатып алса, ереже білмейтін осынша адам жолға шығып кетер еді.
2024 жылы Қазақстанда жүргізуші куәлігін өзі оқып алуға тыйым салынған. Демек мемлекеттік корпорация жариялаған осы есеп елдегі автомектептердің теорияны оқыту сапасы төмен екенін әрі оны өзгерту қажет екенін көрсетіп отыр. Былтыр полицейлер мұндай оқу орнын ашу тәртібін өзгертуге уәде берген. Бірақ ол қашан жүзеге асатыны белгісіз.
Жақында сенаторлар да автомектептердің жүргізуші даярлау деңгейі төмен деді. Олар депутаттық сауалында жүргізушілер жолда тәртіп сақтамағындықтан, жол апаты көбейіп жатқанын айтып, мынадай ұсыныс жасады:
- Автомектептер қызметіне мемлекеттік бақылау мен аккредитация талабын енгізу, оқу бағдарламасы мен практикалық дайындық стандартын күшейту;
- Жол апатының негізгі себептерін анықтайтын бірыңғай ұлттық жүйе құрып, нақты дерекке сүйене отырып профилактикалық шараларды күшейту;
- Жастардың техникалық дайындығын арттыру, жол мәдениетін қалыптастыру және жүргізушілерді сапалы оқыту мақсатында ұлттық жүйе енгізу мәселесін қарастыру.
Комментариев: 0