Киноға бергісіз оқиға Алматыдағы Төле би мен Тілендиев қиылысында болған. Бақылау камерасы түсіріп алған кадрдан Төле би көшесінде артына полицей жармасқан мопед аса жылдам қозғалып бара жатқанын көруге болады.
Жергілікті ПД хабарлағандай, шлем киген екі жігіт мопедті ұрлап кеткен. Сол маңды тексеріп жүрген полиция қызметкерлері екеуін байқағанмен, бағдаршамда тұрған көлік кедергі болып, жете алмапты. Сол сәтте аға лейтенант Елдар Тоқташев қылмыскерлердің ізіне жаяу түсуге бел буады.
Заң өкілдерінің тоқта деген талабын мүлде елемеген бір күдікті қашып кетуге тырысқанда полиция қызметкері мопедтен ұстап үлгереді, бірақ тізгіндегі жігіт оны бірнеше метр сүйреп, көлікке соғылғанда ғана тоқтаған.
«Жарақат алғанына қарамастан полиция қызметкері ерлік танытып, күдіктіні ұстады. Тергеу барысында ол қала аумағында кем дегенде төрт ұрлыққа қатысы бар болуы ықтимал екені анықталды», — деді департамент өкілдері.
Күдікті азамат қамалды. Қазір сотқа дейінгі тергеу жұмыстары жүріп жатыр.
Комментариев: 0