Michelotto Gruppo 4 Tributo — Ferrari 308 стиліндегі рестомод

1975 жылы жарық көрген Ferrari 308 Маранелло машиналарының стилистикасы алдағы он-жиырма жылда қандай болатынын айқындап берді. Ең бастысы, модельдің 12 мың экземпляры сатылып, компанияның мұнай дағдарысы кезіндегі табысын қамтамасыз етті. Michelotto фирмасы 308-дің раллиге арналған түрленімін де әзірледі.

Бірнеше жыл бұрын Michelotto түлегі Франческо Кальцавара AC Motorsport компаниясын құрып, көрермен назарына раллиге арналған Ferrari 308-дің интерпретациясын ұсынды (машина жылдамдықтан ләззат алуға арналған). Автомобиль түпнұсқа көліктің пропорциясы мен эстетикасын сақтай отырып, жеңіл композит шанақ панелі мен қауіпсіздік каркасы бар шассиге негізделді.

Michelotto Gruppo 4 Tributo деп аталатын машинаның салмағы 950 келі ғана. Ол кабина артында орналасқан 3.4 литрлік атмосфералы V8-бен жүреді. 380 ат күшіне ие (364 Нм) мотор 5 сатылы механика қораппен жұмыс істейді. Суперкар реттелетін амортизаторы бар тәуелсіз аспа және Brembo тежеуішімен жабдықталған.

Автомобильдің динамикалық сипаттамасы белгісіз, бірақ салмағы мен моторының қуатын ескерсек, бұл көрсеткіш нашар болмайтын шығар.

Michelotto Gruppo 4 Tributo-ның экстерьері ескі Италия автоөнеркәсібінің жанкүйерлеріне ұнайды. Дизайнерлер 308-дің дәстүрлі жылжымалы алдыңғы шамын, дөңгелек артқы шамын және ретро-стильдегі 18 дюймдік бес шабақты дөңгелек дискісін қайта жаңғыртты.

Екі орынды салонда мультимедиа жоқ, онда үлкен цифрлық аспаптар панелі, үш шабақты рөл, беріліс қорабының қарапайым металл иінтірегі, көптеген тумблер-ауыстырғыш және карбон орындық қана бар.

AC Motorsport машинаның бағасы мен нақты квотаны әлі ресми жария етпеді. Бірақ Michelotto Gruppo 4 Tributo арзан болмайтыны анық.