2009 жылдан бері Қытайдың SAIC концерніне тиесілі британиялық MG бренді Ресейде дистрибьютор тапты. Бұл қызметті InTelGo Cars компаниясы атқарады. Автоөндіруші мен дистрибьютор MIMS аясында келісім жасаған көрінеді. Автомобиль бағасы 1 590 000 рубльден (7.7 млн теңге) басталады, сервистік қызмет көрсету және үш жыл кепілдік мерзімі бар.
Марка MIMS көрмесінде жұрт назарына екі машина ұсынды. Біріншісі 181 ат күшіне ие 1.5 литрлік моторы вариатормен жұмыс істейтін, алдыңғы жетекті MG One кроссовері. Екіншісі 261 ат күшіне ие 2 литрлік мотормен (9 сатылы автоматпен жұптасады) жүретін MG 7 Trophy+ спорттық лифтбегі. Бірақ Ресейдегі MG сайтында өзге де модельдер көрсетілген, арасында кроссовер, минивэн және пикап бар.
Қолда бар автомобильдердің бағасы — 2 829 000 рубль (13.7 млн теңге) және 4 599 000 рубль (22.4 млн теңге). Ал MG 7 лифтбегінің қуаты төмен мотормен жүретін түрленімін 3.5 миллионға (17 млн теңге) алуға болады.
Мәскеуде алғашқы шоурум жұмыс бастады. Марка алда басқа өңірлерде дилерлік орталық ашуды жоспарлап отыр. InTelGo автобөлшек жеткізу мен сатудан кейінгі қызмет көрсетуді мойнына алады. Қазір Ресейге небәрі жиырмаға жуық машина жетті. Импорттаушы негізінен тапсырыс бойынша жұмыс істейді.
Қытайда шыққан MG Қазақстан жұртына да таныс. Бренд 2013 жылы MG350, MG6 седандары мен MG5 хетчбэгін әкелген. Бірақ біздің елде ұзақ тұра алмады.
Комментариев: 0