«Мерседес» BMW моторымен жүреді

Ежелден қарсылас атанып, бір-біріне дес бермей келе жатқан Mercedes-Benz пен BMW серіктес атануы ықтимал. Manager Magazin басылымы «Мерседес» конвейеріне бавариялық мотор жеткізу туралы келісім жүріп жатқанын хабарлады. Мәміле сәтті аяқталса, бөтен агрегатпен жүретін алғашқы модель 2027 жылы жарық көреді.

Қазір екі тарап тек 4 цилиндрлі бензинді агрегаттың жайын талқылап жатыр. Басылымның дереккөзі жеткізу процесі шынымен басталса, болашақта гаммаға дизель де, трансмиссия да қосылады депті.

Mercedes-Benz-тің шеттен бөлшек іздеуіне компанияның стратегиясы мен саяси жағдай әсер еткен сияқты. Өндіруші толығымен электромоторға көшуден бас тартып, гибридке мән беруді көздеп отыр. Ол үшін өте көп шағын ІЖҚ керек. Компания Geely-ден көмек сұраса болар еді, алайда Қытайда жасалған моторы бар машинаны АҚШ-та өткізу қиын.

Өндірушілердің қаражаттан қиналуы да күш біріктіруге итермеледі. Келісім жасалса, BMW агрегат алатын жаңа клиент табады, ал Mercedes-Benz кәдімгідей ақша үнемдейді.

Концерндер мәмілеге келу үшін өз ішінде техникалық топ құрыпты, әрқайсысын директорлар кеңесінің төрағасы басқарады. Екі тарап кеден салығын айналып өту үшін Солтүстік Америкада мотор шығаратын зауыт салу мүмкіндігін қоса қарастырады.